Basha: Kajmaku të përballet me drejtësinë, nuk mund të bëj viktimën

Lideri demokrat Lulzim Basha akuzon kryeministrin Rama se ka marrë në mbrojtje kryenbashkiakun e Vorës, Agim Kajmaku.

Basha teksa ka publikuar dy vendime të drejtësisë greke, shprehet në profilin e tij në “Facebook”, se kryebashkiaku I Vorës nuk mund të bëj dot viktimën pasi është në kërkim nga autoritetet greke pasi ka përdorur, sipas tij, para të falsifikuara.

Basha thotë se Kajmaku duhet të përballet me drejtësinë shqiptare dhe atë greke për të gjitha faktet që PD ka bërë publike.

“Edi Rama mori 6 orë për t’u thënë shqiptarëve se kandidati i tij i Vorës Agim Kajmaku ka qenë emigrant dhe ka ndryshuar emrin. Asnjë fjalë për krimin që Agim Kajmaku ka bërë në Greqi si emigrant me emrin Jorgo Toto, për të cilin është arrestuar në vitin 2003 dhe është akoma në kërkim. Agim Kajmaku i Edi Ramës i ka problemet me ligjin jo pse ka qenë emigrant, as pse ka ndryshuar emrin. Të tillë ka pothuajse çdo familje shqiptare. Agim Kajmaku është arrestuar dhe është në kërkim nga drejtësia greke, sepse ka përdorur para të fallsfikuara. Agim Kajmaku nuk mund të bëjë dot viktimën! Ai duhet të përballet me drejtësinë shqiptare dhe greke për fakte konkrete, të bëra publike nga Partia Demokratike dhe për të cilat nuk ka thënë asnjë fjalë.”

Kreu demokrat në postimin e tij jep më tej edhe të gjitha faktet se përse duhet të përballet me drejtësinë Agim Kajmaku.

“Agim Kajmaku me emrin Jorgo Toto është arrestuar në Greqi në vitin 2003 për një krim që dënohet deri në 10 vjet burg. Agim Kajmaku e ka fshehur arrestimin në Formularin e Dekriminalizimit. Agim Kajmaku alias Jorgo Toto, sot e kësaj dite, është me masë arresti me burg në fuqi në Greqi. Agim Kajmaku me emrin Jorgo Toto, me proces penal të hapur në Greqi, është në kërkim nga drejtesia greke. Agim Kajmaku ndalohet nga ligji i dekriminalizimit të jetë kandidat për kryetar bashkie. Për fshehjen e krimit ligji parashikon humbjen e menjëhershme të mandatit dhe burg deri në 4 vjet.”

Kreu demokrat e pyet gjithashtu kryebashkiakun e Vorës nëse është ai apo jo personi me emrin Jorgo Tota që është arrestuar në Greqi në janar të vitit 2003 ndërsa thekson se historia me liomonë të shtrydhur është një vetëtallje e sajuar nga kryeministri Edi Rama.

“Përpara se të dalë nga Bashkia e Vorës me pranga në duar, Agim Kajmaku duhet t’i japë përgjigje një pyetje shumë të thjeshtë: · A është ai personi i arrestuar në flagrancë në janar 2003 me emrin Jorgo Toto? Historia me limonë të shtrydhur, është vetëtallje e sajuar keq nga Edi Rama, i cili me histori të tilla, ka dështuar me limonët e shtrydhur dhe të hedhur, nga Elvis Roshi te Arben Ndoka dhe Valdrin Pjetri. E sigurt që do të dështojë edhe me Jorgo Kajmakun.”

evn