Institucionet e Kosovës e kanë pranuar pjesën e parë të ndihmës prej 5 milionë euro të cilën e ka ndarë Bashkimi Evropian për të luftuar pandeminë e COVID-19.
“Kjo ndihmë, përfshin mbi 1.4 milionë doreza të ndryshme mbrojtëse mjekësore, 4 mijë mburoja për fytyrën, 3 mijë syze mbrojtëse, 4 mijë litra dezinfektues duarsh, 10 mijë palë shtroje njëpërdorimshe, dhe 50 kuti për transportimin e mostrave laboratorike”, thuhet në komunikatën e Ministrisë së Shëndetësisë.
Shefja e Zyrës së Bashkimit Evropian në Kosovë, Natalia Apostollova, e cila e bëri dorëzimin e ndihmës, tha se përkundër situatës së vështirë me të cilën po përballen vendet anëtare të BE-së, ato kanë vendosur të ndihmojnë Kosovën në përballimin e kësaj situate.
“Ky është momenti kur mund të ofrojmë mbështetje konkrete të Bashkimit Evropian për njerëzit në nevojë dhe profesionistët e shëndetësisë, ata që janë në vijën e parë të kësaj pandemie – në luftë për të shpëtuar jetët e njerëzve”, tha Apostolova.
KUMTESË PËR MEDIA Prishtinë, 30 prill 2020Bashkimi Evropian i dorëzoi sot Kosovës pjesën e parë të ndihmës emergjente…
Publiée par Ministria e Shëndetësisë sur Jeudi 30 avril 2020
Pjesa tjetër e ndihmës do të dorëzohet gjatë javëve të ardhshme.
Përveç kësaj ndihme direkte për sektorin e shëndetësisë, BE-ja po përgatit edhe rreth 63 milionë euro si masa afatmesme për ndihmë për grante socio-ekonomike, si dhe rreth 100 milionë euro kredi si ndihmë makro-ekonomike për Kosovën.
Më 29 prill Komisioni Evropian ka prezantuar paketën e ndihmës për Ballkanin Perëndimor.
Kjo paket, që përfshinë asistencën financiare të BE-së dhe Kreditë e Bankës Evropiane të Investimeve, mbërrin shifrën prej 3,3 miliardë euro.
Sipas njoftimit të Komisionit Evropian kjo paketë ka për qëllim adresimin e menjëhershëm të nevojave shëndetësore dhe humanitare të shkaktuara nga pandemia e koronavirusit si dhe për rimëkëmbjen sociale dhe ekonomike.
