Teksa e gjithë bota e ka vëmendjen të përqendruar te pandemia e koronavirusit të ri, që ka shkaktuar mbi 370 mijë vdekje në mbarë globin, në Republikën Demokratike të Kongos është rishfaqur një sëmundje e tmerrshme, e cila sikur ishte lënë harresës këto kohë – ebola.

Sëmundja po përhapet në qytetin perëndimor, Mbandaka, më shumë se 1,000 kilometra larg një shpërthimi me të njëjtën virus, në lindje të vendit.

Ministri i Shëndetësisë, Eteni Longondo tha se katër persona që kanë vdekur në Mbandaka, janë konfirmuar si raste pozitive pas testimit në laboratorin kombëtar në Kinshasa.

“Kemi një epidemi të re të Ebolas “, tha ai duke shtuar se “shumë shpejt do të dërgojnë vaksinën dhe ilaçet”.

Shpërthimi është konfirmuar edhe nga drejtori i Organizatës Botërore të Shëndetësisë, Tedros Adhanom Ghebreyesus.

“Ky zhvillim është një rikujtesë e faktit se Covid-19, nuk është kërcënimi i vetëm me të cilin përballen njerëzit”, tha ai.

Kongoja ka bërë përpjekje për t’i dhënë fund një shpërthimi gati dyvjeçar të ebola, pranë kufijve lindorë më Ruandën dhe Uganda.

Në prill, autoritetet ishin shumë pranë afër shpalljes së fundit të shpërthimit të dhjetë të kësaj sëmundjeje që kur u zbulua ky virus në vitin 1976, por një zinxhir i ri infektimesh është konfirmuar në lindje të shtetit./tch