Ish-kryebashkiakja e Gjirokastrës, Zamira Rami, është dënuar me 1 vit shërbim prove. Sipas News 24, Zamira Rami është e detyruar të kryejë punë me interes publik. Vendimi për të është dhënë sot nga Gjykata e Posaçme kundër Krimit dhe Korrupsioni. Ish-kryebashkiakja e LSI akuzohej për “shpërdorim detyre”.
Kujtojmë se Prokuroria e Posaçme kundër Korrupsionit dhe Krimit të Organizuar, SPAK dërgoi për gjykim çështjen penale në ngarkim të ish-kryetares së Bashkisë Gjirokastër, Zamira Rami. SPAK e akuzoi ish-kryetaren e Bashkisë Gjirokastër se në kundërshtim me ligjin, ka kryer veprime që kanë sjellë prishjen e dy pronave private gjatë realizimit të dy projekteve, një prej të cilave në kuadër të Rilindjes Urbane.
Sipas SPAK, shkeljet janë kryer gjatë zbatimit të projektit për ‘Rikonstruksionin e rrugës Kryqëzim me rrugën nacionale (Postbllok) – Sheshi i Çerçizit’ si dhe për ‘Rikualifikimin e hapësirave publike dhe rrugës hyrëse pranë Memorialit të Rilindasve në Gjirokastër.
“…ka kryer veprime në kundërshtim me aktet ligjore në fuqi, duke prishur dy prona të ligjshme të shtetasve Dritan Sako dhe Teodorti Xhai dhe duke u shkaktuar atyre një dëm pasuror në vlerë 5 600 520 lekë,” thuhej në njoftimin e SPAK.
Zamira Rami u zgjodh në krye të bashkisë Gjirokastër në vitin 2015-të si përfaqësuese e Lëvizjes Socialiste për Integrim me 54.47 % të votave.
