Vendosja e një date të re për zgjedhjet vendore e ka futur Shqipërinë në një krizë politike, të thelluar edhe më tepër nga akti i presidentit Ilir Meta për ta anuluar fare këtë datë.
Meta me nxitim ka nisur të takojë aleatët e krye demokratit Lulzim Basha, dhe në thelb të këtyre takimeve është caktimi i një date të re për mbajtjen e zgjedhjeve vendore.
Nga ana tjetër kryeministri Edi Rama shpreh sërish vendosmërinë për 30 qershorin duke e quajtur vendimin e Metës “nul”.
Zëra nga opozita flasin për shtyrjen e zgjedhjeve me të paktën 6 muaj, por ekziston edhe një version tjetër; ai i mbajtjes së zgjedhjeve në muajin tetor.
Duket se këtë version e ka zbuluar pa dashur kryebashkiaku i Kamzës, Xhelal Mziu. Ky i fundit, në një postim në rrjetet sociale ku e sfidon kryebashkiakun e Tiranës Erion Veliaj për gjendjen e rrugëve, zbulon edhe datën e mbajtjes së zgjedhjeve lokale sipas demokratëve.
“Zgjedhje në 30 qershor nuk ka për të patur kurrë”, shkruan Mziu, ndërsa më tej vijon duke e ftuar Veliajn të përballet “në zgjedhjet reale”, në 20 tetor.
“Shihemi në zgjedhjet reale të 20 tetorit 2019”, shkruan në fund të postimit Mziu. A është vendosur tashmë data e zgjedhjeve vendore në 20 Tetor të 2019-ës? Mbetet për t’u parë.
