Partneri i koalicionit qeveritar BESA, e Afrim Gashit, ka idenë se si presidenti i ardhshëm i shtetit të jetë konsensual, d.m.th. i pranueshëm për të gjithë. Udhëheqësi i këtij krahu në një deklaratë për Alsat thotë se në fakt, partitë në zgjedhje duhet të dalin me kandidatët, që do të ishin rezultat i një konsensusi më të gjerë.
“Ne besojmë se me negociatat më të gjera, që përfshijnë edhe partitë opozitare, mund të gjenden disa kandidatë jo partiak për president, të pranueshme për të gjithë, ndërsa më i miri le të fitojë. Megjithatë, kjo do të ishte rezultat i një konsensusi më të gjerë “. – u shpreh Afrim Gashi, BESA.
Por, ky është vetëm mendimi i tij ndërsa për zgjedhjet presidenciale ende nuk kanë diskutuar as në parti, e as me partitë tjera.
Nga krahu opozitar i Besës së Bilall Kasamit, thonë se do të mbështesin një kandidat jo partiak, një shqiptar, i cili do të ishte i pranueshëm për partitë shqiptare. Por, ende nuk kanë pasur bisedime me asnjë parti. Megjithatë, ata po e konsiderojnë mundësinë për të mbështetur një kandidat me propozimin e diasporës shqiptare.
“Një kandidat konsensual zgjidhet në Parlament, por me sistemin tonë të drejtpërdrejtë zgjedhor, historia e një kandidati konsensual është vetëm një mjet i përdorur për fushatat partiake dhe në fund doli Maqedonia të marrë një president të tillë si ai i tanishmi. Nuk mund të jetë një kandidat konsensual, ai për të cilin do të pajtohen dy ose tre parti “. – theksoi Arianit Hoxha, BESA.
Tema e zgjedhjeve presidenciale nuk është hapur në organet e Aleancës për shqiptarët, e Zijadin Selës. Ata nuk e dinin nëse do të shkonin me kandidatin e tyre, ose do të bashkëpunonin me partitë e tjera opozitare.
“Presidenti i ardhshëm duhet të udhëheqë politika konsensuale, dhe jo vetëm për të mirën e partive në pushtet”. –tha Flakron Bexheti, Aleanca për shqiptarët.
Kryeministri Zoran Zaev dje tha se dëshironte një kandidat presidencial konsensual, siç tha ai, një njeri i cili do të jetë babai i kombit prapa të cilit do të qëndrojnë të gjithë. Ai paralajmëroi konsultime më të gjera me partnerët e koalicionit qeveritar.
Ministrja e mbrojtjes Radmilla Sheqerinska nuk u përgjigj nëse e sheh veten si një kandidate konsensuale për presidente, e cila është përmendur një kohë të gjatë mes kandidatëve të mundshëm të koalicionit qeverisës.
“I gjithë fokusi i qeverisë, dhe angazhimi im personal, i kushtohet qëllimit tonë strategjik. Ky nuk është qëllimi im personal strategjik, është qëllimi strategjik i këtij vendi dhe i të gjithë qytetarëve që na kanë dhënë besim. Do të ishte një tradhti në atë besim, tani një pjesë e energjisë sonë të shkojë në zgjedhjet e ardhshme “. –u shpreh Radmilla Sheqerinska – Ministre e Mbrojtjes.
Nga BDI, për Alsat thanë se kandidati duhet të jetë i pranueshëm jo vetëm nga partitë politike, por edhe nga qytetarët dhe organizatat qytetare, siç thonë ata, të mos na ndodhë Ivanovi 2.
Deri më tani, askush nuk ka aplikuar ende në thirrjen e shpallur publike për zgjedhjen e një kandidati për president, që dje e shpalli VMRO-DPMNE-ja opozitare.
