Në fshatin Brekoc të Gjakovës në vendin ku janë të varrosur dëshmorët e luftës janë gjetur mbetje mortore të një personi.
Sipas Policisë trupi i gjetur kishte të veshur uniformë ushtarake të Ushtrisë Çlirimtare të Kosovës, njofton Klan Kosova.
“Sot me datë 15.02.2021 rreth orës 10:00, Stacioni policor – Gjakovë ka pranuar informatë se në varrezat e qytetit të Gjakovës që janë më lokacion në lagjen e Brekocit, në vendin ku janë të varrosur dëshmorët e luftës së fundit në Kosovë, janë gjetur mbetje mortore të një personi të pa identifikuar- panjohur, e që ishte me veshje ushtarake dhe emblem të UÇK-së”.
Në mbetjet mortore kishte hasur punëtori i varrezave të qytetit, njofton Klan Kosova.
“Patrulla policore ka dalë në vend të ngjarje, ka kontaktuar me dëshmitarin e rastit, e që është dhe punëtor i varrezave të qytetit, dhe njofton se derisa po hapte një gropë vorri ka hasur në mbetjet mortore në fjalë”.
“Dyshohet se mbetjet mortore i përkasin një ushtari të UÇK-së deri tani të pa identifikuar, gjithashtu nuk dihet dhe nga kush është varrosur aty”.
Në vend ngjarje ka dalë njësia e hetimeve të stacionit policor – Gjakovë, ato Rajonale dhe pritet së shpejti të dali dhe Njësia qendrore e Hetimit të Krimeve të Luftës.
