‘Konfirmohet’ lidhja e Eros Grezdës me moderatoren shqiptare

Jo më larg se gjashtë muaj më parë, në rrjet qarkulloi lajmi se mes moderatores së ëmbël Nevina Shtylla dhe futbollistit të Kombëtares Eros Grezda mund të kishte nisur një histori dashurie.

Kjo, sepse ata postuan një foto së bashku, ku dukeshin shumë intimë me njëri-tjetrin.

Edhe pse asgjë nuk u konfirmua dhe Nevina tregoi se ishin takuar rastësisht, ditën e sotme, thashethemet kanë nisur sërish dhe jo pa arsye. Pak ditë më parë, Nevina publikoi një foto në “Instagram” dhe Eros i komentoi me një “emoji” sirenë, shkruan “Panorama Sport”. Nga ana tjetër, ish-Miss-i 25- vjeçare iu përgjigj me dy përqafime, duke hedhur kështu hapin e parë të daljes hapur me futbollistin seksi, pas 6 muajsh që e mbajtën lidhjen sekrete,

Image

Kaq u desh që fansat të binden se kjo është një romancë dashurie, që Nevina po shijon pas kamerave me futbollistin Eros. Kujtojmë, që dyshimet se në jetën e saj kishte hyrë një djalë që po e bënte të lumtur lindën pak javë më parë kur Nevina festoi 25-vjetorin. Përveç festës me stafin e “E Diell” dhe miqtë e saj më të ngushtë, ajo publikoi një foto në “Instastory”, ku zbuloi se kishte marrë dhuratë tri buqeta të mëdha me lule dhe trëndafila.

Image

Ndjekësit menduan se kjo ishte dhuratë romantike nga i dashuri, për të cilin prezantuesja e “Procesi Sportiv” tha se preferon ta mbajë jashtë vëmendjes së publikut. Festa e mbrëmjes të së enjtes ishte e mbushur me surpriza dhe dhurata nga të ftuarit, ku munguan dhe fishekzjarrët, megjithatë dita e nesërme vërtetoi se ditëlindja e saj nuk do mbyllej me aq. Ndërkohë, miq të afërt të Nevinës kanë treguar për “Panorama Plus”, se ajo tashmë është duke jetuar një lidhje speciale me Eros. Madje, mendojnë se ata tashmë kanë filluar pushimet së bashku, duke qenë se të dy postojnë në “Instagram” foto plazhi ku duken shumë në formë.

EROS, DASHURIA QË E SHËROI NGA DËMTIMI

Ndërkohë, ky vit më Eros Grezdën nuk ka nisur aq i mbarë sa i takon shëndetit dhe karrierës, por të paktën i ka ecur në dashuri. Kujtojmë që në janar, Eros Grezda u dëmtua gjatë periudhës përgatitore të ekipit të Glasgow Rangersit në Tenerife të Spanjës. Lojtari lëndoi kyçin e këmbës, e cila i solli probleme në përshtatje me futbollin skocez kur u transferua në përfundim të sezonit veror vitin e kaluar nga Osijek.

Lojtari u pa duke ecur me paterica, pamje të siguruara nga e përditshmja britanike “Daily Record”. Kjo u konsiderua një goditje e rëndë jo vetëm për Rangers, që kanë infermierinë të mbipopulluar, por sidomos për Kombëtaren, kur Grezda është lojtar shumë i vlefshëm për ekipin.Por natyrisht që Eros e kaloi këtë situatë, duke hyrë në stinën e verës në superformë, me fizikun për t’u admiruar.

Image

Ai ka postuar disa foto në “Instagram” nga pushimet, ku të afërmit e komplimentojnë për muskujt e barkut kryesisht. Hera e parë që ai u komentua për një lidhje me Nevinën ishte para 6 muajsh, kur gjatë pushimeve dimërore për festat e fundvitit, lojtarët shqiptarë të futbollit u kthyen në Shqipëri për të qëndruar disa ditë me familjarët e tyre dhe njerëzit më të dashur.

Image

Nga Skocia kishte ardhur edhe futbollisti seksi Eros Grezda, i cili gjatë qëndrimit në Tiranë i memorizoi momentet e bukura që kaloi, me një foto me moderatoren e “Procesi Sportiv”, Nevina Shtylla. Ngacmimet për këtë foto nuk munguan as nga partneri televiziv i Nevinës, Edi Manushi, në emisionin “Procesi Sportiv”, i cili donte të dinte më shumë për lidhjen e Nevina Shtyllës që fshihej pas kësaj fotoje festive. Duke qeshur dhe e lumtur, Nevinës i shkëlqyen sytë kur në monitorin e emisionit u shfaq fotoja e saj me Erosin 24-vjeçar.Ajo iu përgjigj ngacmimeve të Manushit, duke i dhënë shpjegime në këtë mënyrë: “Këtë javë kishim këtu disa nga çunat e Kombëtares. Kishin ardhur për pushime. Më tha të të bëj të fala! Bashkë me Grezdën u gjetëm rrugës (qesh). U takuam rastësisht, folëm, më tha t’i bëj të fala Manushit!” Por ndjekësit komentuan se, në fakt, ngacmimet e Manushit kanë qenë jo pa qëllim, pasi po flitej se mes Nevinës dhe Grezdës kishte nisur diçka më shumë

KUSH ËSHTË EROS GREZDA, SULMUESI MISTERIOZ QË ÇMEND FEMRAT

Eros Grezda, i lindur më 15 prill 1995 në Gjakovë, është 1.80 m i gjatë dhe është futbollist profesionist shqiptar, që luan si mesfushor dhe sulmues për klubin skocez “Rangers” dhe në ekipin Kombëtar shqiptar. Ai lindi në Gjakovë, por u rrit në Prishtinë, si fëmija i tretë i Genc dhe Valbona Grezdës. Karrierën futbollistike e nisi pikërisht me Prishtinën, duke luajtur mes moshës 9 dhe 15 vjeç. Ai më pas u zhvendos për një kohë të shkurtër në FK Rabotnicki, ku u ndoq nga GNK Dinamo Zagreb, ku do të kalonte 1 vit atje, duke luajtur me U-17.Në verën e vitit 2012, Grezda nënshkroi për klubin austriak Grazer AK. Grezda arriti në Slloveni në verën e vitit 2013, duke nënshkruar për klubin NK Aluminij. Ai pastaj u ngrit në nivel, duke nënshkruar klubin e PrvaLiga, DNŠ Zavrc në janar 2015 së bashku me Antonio Pavic. Pas një karriere të spikatur më 31 gusht 2018, klubi skocez Rangers konfirmoi se Grezda kishte nënshkruar kontratë katërvjeçare.

Image

Grezda mori nënshtetësinë shqiptare më 31 janar 2016. Thirrjen e parë nga trajneri i Kombëtares shqiptare, Gianni De Biasi, e mori për ndeshjet e kualifikimit të Kupës Botërore FIFA 2018 kundër Lihtenshtajnit dhe Spanjës, në tetor 2016. Ai u ftua për ndeshjen e 5-të 2018 të kualifikimit të Kupës së Botës në FIFA kundër Italisë, më 24 mars 2017 dhe ndeshjen miqësore kundër Bosnjë Herzegovinës, më 28 mars 2017.Grezda bëri debutimin e tij të parë më 24 mars 2017 kundër Italisë si zëvendësim në minutën e 87-të në vend të Odise Roshit. Sa i përket jetës private, ai nuk është përfolur për ndonjë lidhje, ose më mirë të themi nuk është mediatizuar për ndonjë histori të bërë publike më parë, por njihet si sulmuesi seksi që çmend femrat në rrjetet sociale. Duket se takimi pas kamerave me prezantuesen e emisioneve sportive, e ka bërë të ndalet te kjo vajzë për të nisur një lidhje të bukur.

“Miss Shqipëria 2010”, tashmë 25 vjeç, gjatë vitit që lamë pas u largua nga “Tv Klan” për t’iu bashkuar “Top Channel”. Edhe pse për jetën private është treguar diskrete, mesa duket, gjërat brenda vitit kanë ndryshuar dhe tashmë Nevina është gati për një fillim të ri. Ndërkaq, lidhjet e futbollistëve me moderatoret e emisioneve sportive ndodhin shpesh, duke qenë se i lidh puna me njëri-tjetrin.

Image

evn