PZAP-i e ka refuzuar si të pabazuar kërkesën e LVV-së për numërimin e mbi 4500 zarfeve me fletëvotime nga diaspora. Ndërkohë, LVV-ja ka deklaruar se do ta dërgojë sërish apelin në Gjykatën Supreme. Ndërkohë, zëdhënësi i KQZ-së, Valmir Elezi, i ka thënë gazetës “Zëri” se KQZ-ja do të presë afatin ligjor pas vendimit të PZAP-it që të hedhë poshtë kërkesën e LVV-së. “Komisioni Qendror i Zgjedhjeve do të presë afatin ligjor para se të procedojmë më tej, pasi në fund të vendimit të PZAP-it ka këshillë juridike, pra lejohet ankesa kundër këtij vendimi në Gjykatën Supreme brenda 24 orëve”, ka thënë ai për gazetën “Zëri”.

Ai më tutje tha se rezultatet përfundimtare nuk do të shpallen në përmbylljen e kësaj çështjeje. “KQZ-ja nuk do të shpallë rezultatet përfundimtare pa u përmbyllur edhe kjo çështje”, ka thënë ai. Elezi i tha “Zërit” se KQZ-ja tani do të shpallte rezultatet përfundimtare po të mos ekzistonte çështja e 4639 votave të diasporës. “Po të mos ishte kjo çështje ne edhe sot do t’i shpallnim rezultatet. Mirëpo s’mund ta bëjmë këtë pa përfunduar kjo çështje”, ka thënë ai. Ndërkaq drejtori ekzekutiv i Institutit Demokratik të Kosovës (KDI), Ismet Kryeziu, po e cilëson si të drejtë dhe korrekt vendimin e PZAP-it për refuzimin e numrit të votave të ardhura me postë pas datës 6 tetor.

Artikulli paraprakRuskovska: Kërkuam paraburgim për njërin sepse ka hotel në Greqi, mund të arratisej
Artikulli tjetërPamje të papublikuara më parë: Familja Jashari tri javë para sulmit nga serbët