Lazim Destani: Të jemi të bashkuar për të tjera suksese të Shkëndijës

Shkëndija e Tetovës mori të dielën titullin e kampionit në Ligën e Parë të Maqedonisë së Veriut për të dytin vit radhazi dhe për herë të tretë në histori, pasi dominoi përgjatë gjithë sezonit.

Marketing

Një ditë pas festës, Lazim Destani, pronari i Ecolog, që sponsorizon ekipin, me një letër të hapur ka uruar gjithë ata që ndiejnë veten të afërt me skuadrën kuqezi.
“E nderuara familje e madhe kuqezi, të nderuar lojtarë të KF Shkëndija, trajnerë, staf i administratës, gjithë ju që jeni pjesë e klubit dhe ju të nderuar spektatorë të skuadrës sonë të përbashkët!

Jam i gëzuar që ne, të gjithë së bashku, vazhdojmë të shënojmë momente të reja suksesi me skuadrën tonë të dashur, me Shkëndijën. Në mënyrë të veçantë më gëzon titulli i ri i kuqezinjve tanë, kampion shtetëror, duke manifestuar edhe në këtë stinor dominim në elitën e futbollit në vendin tonë.
Jemi krenarë që hap pas hapi po arrijmë që premtimet t’i kthejmë në vepra dhe uroj e besoj që të gjithë së bashku do të vazhdojmë të ecim përpara me këtë ritëm zhvillimi.

Çdo titull i fituar e ka shijen e vet, ndërsa e veçanta e sivjetme është se Shkëndija po e prek një tjetër moment historik, pra për herë të parë sivjet Shkëndija e mbrojti titullin e kampionit.

Katër trofe brenda tre viteve është arritje historike për Shkëndijën dhe duke i ditur ambiciet tona të përbashkëta, këto suksese na inkurajojnë të punojmë me përkushtim akoma më të madh drejt sfidave të reja që i kemi në rrugën e ecjes sonë përpara.

Jam i bindur se Shkëndija do të vazhdojë punën me dedikim për ta dominuar skenën e futbollit në vend. Por, në të njëjtën kohë, ne duam ta bëjmë edhe hapin tjetër të radhës në Kupat e Europës. Tashmë tre vitet e fundit Shkëndija po arrin play-off-in në garën e Europa Ligës, ndërsa uroj që sivjet ta kalojmë këtë prag e ta shijojmë bukurinë e hyrjes në grupe.
Besoj se tash para vetes kemi një verë tjetër përplot me emocione e kënaqësi që do të na sjellin paraqitjet e Shkëndijës në Europë. Uroj me kuqezinjtë të shijojmë sa më shumë suksese e gëzime.

Duke ju falënderuar, ju, mbështetësve të Shkëndijës, që gjithmonë i qëndroni pranë skuadrës suaj të zemrës, dhe në veçanti tifogrupin e Ballistëve, ju ftoj të qëndrojmë të bashkuar në rrugën e Shkëndijës kuqezi drejt sukseseve të reja.”

Marketing