Të premten mbrëma në Podgoricë Mali i Zi do ta zhvillojë ndeshjen kualifikuese për “Euro 2020” kundër Kosovës.
Kjo ndeshje do të zhvillohet pa praninë e publikut për shkak se UEFA e ka dënuar Malin e Zi shkaku i fyerjeve raciste të tifozëve të saj në ndeshjen kundër anglezëve, shkruan Gazeta Express.

Padyshim, kjo vlerësohet si diçka mjaft e mirë për Kosovën sepse ekzistonte rreziku që huliganë serbë që jetojnë në Mal të Zi ta prisnin keq Kosovën, pavarësinë e së cilës nuk e njeh dhe e kundërshton Serbia, por që njihet nga Mali i Zi.

Sidoqoftë, Mali i Zi në radhët e veta do t’i ketë 5-6 serbë kundër Kosovës. Përpos selektorit Lubisa Tumbakoviç, i cili është serb i lindur në Beograd, për shtetin fqinj do të luajnë edhe disa lojtarë të nacionalitetit serb. Ata janë: Mirko Ivaniç, Filip Stojkoviç, Vukan Saviçeviç, Adam Marusiç dhe Marko Simiç, të lindur në Serbi, raporton Gazeta Express.
Ata e kishin zgjedhur Malin e Zi për të luajtur nga frika se në Kombëtaren e Serbisë nuk do të mund të zinin vend.

Ndërkohë, për Malin e Zi luan edhe një shqiptar nga Peja. Ai është Fatos Beqiraj, i cili e pati zgjedhur ekipin malazez në kohën kur futbolli kosovar ishte i izoluar nga UEFA dhe FIFA. Beqiraj mund të jetë kapiten në fushë nëse trajneri i tij serb vendos ta inkuadroi në lojë nga fillimi.