Dënimet për mosvaksinimin e fëmijëve do të variojnë nga 350 në 650 euro, theksojnë nga Ministria e Punës dhe Politikës Sociale.

Ministria e Punës dhe Politikës Sociale thotë se në pajtim me Ligjin për mbrojtjen e popullatës nga sëmundjet ngjitëse ka informuar të gjitha kopshtet publike dhe private se Ministria e Shëndetësisë ka shpallur epideminë e Fruthit. Njëkohësisht nga MPPS ka njoftuar kopshtet që është ndaluar pranimi në kopshte i fëmijëve të pavaksinuar me vaksinën MRP.

“Kopshtet janë përgjegjës për zbatimin e masave sanitaro-higjienike dhe masave kundër epidemisë. Bazuar në atë çfarë u tha më sipër, Ministria e Punës dhe Politikës Sociale thekson se vendimet e miratuara nga Ministria e Shëndetësisë duhet të respektohen. Treguesit dhe rekomandimet janë të dobishme për parandalimin e sëmundjes dhe posaçërisht për sigurinë e fëmijëve” thuhet në deklaratën e MPPS-së.

Ndryshe, dje Ministria e Shëndetësisë shpalli epideminë e Fruthit në territorin e Qytetit të Shkupit për shkak të 12 rasteve të reja të të prekurve.