Nga Republika e Maqedonisë në haxh do të shkojnë 672 besimtarë të cilët prej 11 deri më 15 gusht do të udhëtojnë me katër aeroplanë me fluturim çarter. Këtë e deklaroi sekretari i përgjithshëm i Bashkësisë Fetare Islame të Maqedonisë, Irsal Jakupi.

Nga myftinia e Dibrës e cila i përfshinë komunat Dibër, Qendër Zhupë dhe rajonin e Rekës, komunën e Mavrovë Rostushes, këtë vit në haxh do të shkojnë 26 besimtarë.
“Myftina jonë i ndërmori të gjitha aktivitetet e nevojshme për shkuarje pa pengesa në vendet e shenjta Mekë dhe Medinë, ku realizohet shtylla e pestë e islamit haxhi.

Besimtarët të cilët u paraqitën i kaluan të gjitha kontrollet e nevojshme mjekësore, ndërsa e pranuan edhe vaksinën e nevojshme”, konfirmoi myftiu i Dibrës, Haxhi Ramazan Efendi Hasa.

Besimtarët e këtij rajoni nisen më datën 11 dhe 13 gusht nga Dibra, ndërsa pastaj së bashku me besimtarët e tjerë nga vendi drejtë vendeve të shenjta do të nisen nga aeroporti i Shkupit.