Nesër 72 çerdhet publike në mbarë vendin hapin dyert, duke iu përmbajtur protokolleve. Në to kujdes mund t’u ofrohet 19 mijë fëmijëve.
Rreth 4500 prindër që i plotësojnë kushtet nuk kanë treguar ende nëse do t’i dërgojnë fëmijët e tyre në çerdhe. Drejtoresha e çerdhes “Fidani”, Gëzime Bakiu, thotë se janë përgatitur për të pritur fëmijët.
U apelon prindërve t’ju përmbahen protokolleve e siguron se gjithçka është gati për të mbrojtur shëndetin e më të vegjëlve.
“Klasat do të dezinfektohen çdo 2 orë, atje ku fëmijët do të qëndrojnë normal që duhet të ajrosen klasat. Dritaret duhet të jenë të hapura, aktivitetet do t’i mbajmë më shumë në hapësira të hapura në oborret e kopshteve, por edhe në klasë i kemi kushtet. Do të bëhet vazhdimisht dezinfektimi i klasave, tavolinave, dorezave, d.m.th. në çdo dy orë. Gjatë hyrjes duhet t’i dezinfektojnë duart ku ka mjete edhe për prindërit. Fëmija pranohet nga ana e edukatores, i matet temperatura, në qoftë se çdo gjë është rregull, pranohet. Gjithashtu kemi edhe për dezinfektimin e këmbëve, d.m.th. këpucëve para hyrjes për fëmijët. Pasi të marrë edukatorja fëmijët, u lan duart, ua dezinfekton dhe i fut në klasë.”,- tha drejtoresha e Çerdhes “Fidani”, Gëzime Bakiu.
Sipas protokollit, parashihet për grupet nga 2-6 vjeç të ketë më së shumti 15 fëmijë, kurse për ata deri në 2 vjeç të ketë më së shumti 6 fëmijë. Brenda në kopsht, qëndrimi i fëmijëve të organizohet në mënyrë që t’i iket kontaktit mes grupeve të ndryshme të fëmijëve.
Nuk lejohet përdorimi i lodrave të cilat nuk lahen dhe të punësuarit detyrimisht duhet të mbajnë maska. TVM2
