Nis viti i ri shkollor në Shqipëri, ministrja Nikolla uron nxënësit dhe mësuesit!

Në vigjilje të nisjes së vitit shkollor, Ministrja e Arsimit Lindita Nikolla u është drejtuar me një videomesazh nxënësve, mësuesve dhe prindërve, duke u uruar një rrugëtim të mbarë gjatë këtij viti shkollor.

Marketing

Urimi i parë i Nikollës shkoi për 32 mijë fëmijët e klasave të para që të hënën do të dëgjojnë zilen e shkollës për herë të parë.

“Vëmendja jonë është e gjitha për ju, për secilin prej jush 480 mijë nxënësit e sistemit parauniversitar.Do të studioni me programe mësimore të lehtësuara dhe të larguar nga metoda e vjetër e mësimit përmendësh faqe e faqe të tëra” shprehet Nikolla.

Për vitin shkollor 2018-2019, 39 mijë maturantë do të kenë shansin të provojnë Maturën e Re, që sipas Nikollës është matura e lidhur me Universitetin dhe tregun e punës.

“Ky vit shkollor, vijon Nikolla, ishte dhe viti i librave falas nga klasa e parë në të katërtën. 610 milion lekë taksat tuaj të dashur prindër u kthyen sërish tek ju për tekstet e fëmijëve tuaj”.

Ministrja thekson se “do të vijojmë me programin “Bëj detyrat e shtëpisë” duke kaluar barrën nga ju të dashur prindër tek shkolla për përgatitjen e mësimeve”.

Në përfundim Nikolla pati dhe një paralajmërim të qartë për mësuesit se nuk do të tolerojë asnjë rast dhunë në institucionet arsimore.

“Për ne të drejtat e fëmijëve për të jetuar të lirë dhe të pa cënuar nga çdo lloj forme dhunë është e drejtë themeltare dhe e panegociueshme. Nuk do të tolerojmë askëd”.

Marketing