Drita Abdiu është vajza e vetme shqiptare nga Maqedonia e Veriut që merret me paragliding (hedhje me parashutë). Me këtë sport aspak të zakontë dhe të guximshëm për vajza ajo filloi të merret kur ishte 18 vjeçe, por dëshirën për të fluturuar e ka pasur kur ishte vetëm 10 vjeç.
“Çdoherë kam ëndërruar të fluturoj, shihja Piter Panin dhe aq shume doja që ai ‘pluhuri i zanave’ të ishte i vërtetë të spërkasë pak mbi kokë e të fluturoj bashkë me to”, shprehet Drita.
Ajo ka dy vite që ushtron paragliding, por ende nuk ka marrë pjesë në gara, duke e pasur si synim vitin e ardhshëm. Aktualisht Drita është 20 vjeçe dhe studion në vitin e parë për gjeografi.
Në një lidhje “Skype” për “Wake Up”, Drita ka rrëfyer emocionet e këtij sporti të veçantë.
“Në fillim kur nisem që të fluturoj, vetëm shikoj anash dhe them ‘uau sa bukur’ është. Secili fluturim, e njëjta eksperiencë, ngelem e mahnitur ashtu, duke parë poshtë këmbëve të mia sidomos kur fluturoj mbi qytetin tim, në Tetovë.
Është një ndjenjë shumë e bukur kur shoh Tetovën në pëllëmbë të dorës”, rrëfeu ajo.
