Qëndrimi im dhe i BDI-së për Bashkësinë Fetare Islame (BFI) është se ishte akt skandaloz dhe i turpshëm i sulmit ndaj autonomisë së garantuar me kushtetutë ndaj bashkësive etnike, në këtë rast të BFI-së, deklaroi sot zëvendëskryeministri për Çështje Evropiane Bujar Osmani.
Për këtë, vazhdoi, shteti duhet t’i ndërmarrë të gjitha masat që ta garantojë këtë pavarësi dhe këtë autonomi të bashkësive etnike duke përfshirë edhe BFI-në.
Problemi në BFI eskaloi dje pasdite kur me vendim të gjykatës si kreu i BFI-së ishte emëruar Skender Buzaku, i cili paralajmëroi se prej sot e merr në duar udhëheqjen me bashkësinë etnike. Ai gjatë kësaj theksoi se i ka bërë thirrje policisë financiare që t’i detektojë parregullsitë në punën e trupave udhëheqëse të BFI-së.
Për këtë reagoi Riaseti i BFI-së dhe personalisht reisi Rexhepi, duke e akuzuar për përzierje të ashpër në punën e tyre.
Zëdhënësi i Qeverisë Mile Boshnjakovski në lidhje me këtë çështje paradite, në konferencën e rregullt për shtyp, theksoi se Maqedonia e Veriut është shtet sekular dhe Qeveria nuk përzihet në punën e bashkësive etnike.
Lidhur me akuzat e reisit Sulejman Rexhepi të drejtuara ndaj Qeverisë, Boshnjakovski theksoi se Qeveria e dënon gjuhën e urrejtjes, si çdoherë deri më tani dhe shtoi se institucionet që janë të përfshira në disa probleme të caktuara që ndodhi në BFI do ta japin edhe fjalën e tyre në kohën e dhënë.
Edhe Komisioni për Marrëdhënie me Bashkësitë Fetare dhe Grupet Religjioze në mënyrë të ashpër përgënjeshtroi çfarë do lidhje të tyre në ngjarjet dhe trazirat e fundit në Bashkësinë Fetare Islame (BFI), për çka mbrëmë u akuzua nga Reis ul Ulejma e BFI-së, Sulejman Rexhepi.
Në ngjarjen e mbrëmshme, pas seancës së mbajtur të jashtëzakonshme të Riasetit të BFI-së, Rexhepi në një pjesë të deklaratës së tij i akuzoi drejtorin e Komisionit për Marrëdhënie me Bashkësitë Fetare dhe Qeverinë se janë të përfshira në ngjarjet e fundit në Bashkësinë Fetare Islame.
