Pas një dekade në Vilën Vodno, Presidentit Gjorge Ivanov sot i skadoi mandati i kreut të shtetit. Si Presidenti i katërt me radhë që nga Pavarësia e Maqedonisë, ai në këtë fron qëndroi nga viti 2009 për dy mandate rresht. Ish-shefi i shtetit Ivanov, ishte pasardhës i Branko Crvenkovskit, Boris Trajkovskit dhe Kiro Gligorovit. Në Zgjedhjet Presidenciale të vitit 2009, si kandidat i VMRO DPMNE-së, Ivanov në balotazh fitoi kundër kandidatit të LSDM-së Lubomir Frçkovskit, kurse pas 5 vjetësh mandatin e vazhdoi, gjithashtu nga rrethi i dytë i Zgjedhjeve Presidenciale të vitit 2014, kundër kandidatit Stevo Pendarovski. Ky i fundit arriti ta zëvendësoj atë në fronin e burrështetasit, pikërisht sot, pas skadimit të mandatit të dytë. Por, për çfarë do të mbahet mend Presidenti Ivanov?
Presidenti në ikje në këtë periudhë 10 vjeçare është dëshmuar si një militant i partisë, e cila e ka kandiduar, pra VMRO DPMNE-ja. Njëri i dëgjueshëm i strukturave të saj dhe posaçërisht të ish-liderit Nikolla Gruevski. Por, sidomos Presidenti aktual do të mbahet mend për disa incidente, të cilat kanë ndodhur ose me mos ushtrimin e detyrës së tij konform Kushtetutës ose me shkeljen e kompetencave që ia jep Kushtetuta ose me abstenim të ushtrimit të detyrës së tij.”- theksoi Naser Ziberi, Analist Politik
Pas marrjes së mandatit të dytë, posti i Ivanovit u kundërshtua nga opozita e atëhershme e LSDM-së, me akuzën e falsifikimit të votave, dhe bojkotin e BDI-së për mospërkrahje nga elektorati shqiptarë.
Ai ndryshoi kursin duke ashpërsuar retorikën kundër lëvizjeve opozitare, kurse nuk legjitimoi as Ambasadorët e emëruar shqiptarë. Ivanov gjithashtu, refuzoi të nënshkruaj Ligjin për përdorimin e gjuhëve, duke mos njohur si zyrtare, gjuhën shqipe.
Presidenti Ivanov, njëherit edhe Komandant suprem i forcave të armatosura ushtarake, asnjëherë nuk e njohu emrin e ri të shtetit, duke mos i nënshkruar ndryshmet kushtetuese, të dala nga Marrëveshja e Prespës. Për shkak se mbanin vulën Maqedonia e Veriut, ai nuk nënshkroi asnjë nga ligjet reformuese që së fundmi solli Kuvendi, të vlerësuara nga pushteti si kusht për hapjen e bisedimeve për integrim në BE.
Vendimi i tij në prill të vitit 2016 për falje të përgjithshme për të gjithë të dyshuarit nga Prokuroria Speciale, nxiti “Revolucionin e Larmë”, protesta të cilat për disa muaj kërkuan dorëheqjen e tij. Ai u zmbraps duke tërhequr vendimin pas tre muajsh, por duke akuzuar opozitën dhe ambasadorët e huaj për futjen e vendit në krizë politike.
Nga Instituti për hulumtime politike thonë se vendimet e Ivanovit nuk duhet të merren si qëllimkëqija. Vlladimir Bozhinovski, nga ky institut vlerëson se periudha turbulente e pesë viteve të fundit ka sfiduar skajshmërisht pozitën e kreut të shtetit, por sipas tij, Ivanov ka vepruar me maturi.
Duhet që të kaloj edhe pak kohë për tu shuar frustrimet në shoqëri dhe atëherë të vlerësohet roli i Presidentit në rastet që ndodhën në Maqedoni, parasegjithash do të thoja nga 2004 e këtej. Mendoj se ka bërë disa veprime që mund të ishin kundërthënësve, por vlerësoj se kishte qëllime të mira. Por, është çështje tjetër nëse ato qëllime a kanë prodhuar rezultat tjetër.”- u shpreh Vlladimir Bozhinovski, Analist politik
Sipas analistit Naser Ziberi, Ivanov në mënyrë indirekte ka nxitur ngjarjet e dhunshme të 27 prillit në Kuvend, duke mos i dhënë mandatin për formim të Qeverisë, Kryeministrit të tanishëm Zoran Zaev. Si pasojë, u nxitën protestat e “Të palëkundurve” kundër gjuhës shqipe dhe të ashtuquajturës “Platforma e Tiranës”. Madje, vet ai pati deklaruar se kjo cenën sovranitetin e shtetit, andaj Ziberi thotë se ish-Presidenti Ivanov duhet të ndiqet penalisht, duke dhënë përgjegjësi para drejtësisë.
