Prokuroria Speciale në Hagë kërkesë Apelit: Refuzo ankesat ish-krerëve të UÇK-së

Zyra e Prokurorit të Specializuar në Hagë ka kërkuar që ankesat e Hashim Thaçit, Kadri Veselit, Rexhep Selimit e Jakup Krasniqit ndaj vendimit të gjykatësit Nicolas Guillou lidhur me vazhdimin e paraburgimit ndaj tyre të refuzohen nga paneli i gjykatësve të Gjykatës së Apelit brenda Gjykatës Speciale.

Marketing

ZPS ka kërkuar nga  Gjykata e Apelit që t’i hedhë poshtë tërësisht ankesat e ushtruara nga ekipet e mbrojtësve të ish-krerëve të UÇK-së.

Ish-udhëheqësit politikë e ushtarakë të Ushtrisë Çlirimtare të Kosovës ishin deklaruar të pafajshëm në paraqitjet e tyre të para përpara Gjykatës Speciale. Aktakuza ndaj Thaçit, Veselit, Selimit e Krasniqit është konfirmuar më 26 tetor të vitit të kaluar. Aktakuza i bën përgjegjës ata për një sërë krimesh që pretendohet të jenë kryer midis marsit 1998 deri në shtator 1999.

Sipas aktakuzës, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të “ndërmarrjes së përbashkët kriminale” kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë. Aktakuza u vë barrë atyre, ndërsa i akuzon se ishin ose do të duhej të ishin në dijeni të krimeve tjera.

“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet ndër tjerash në aktakuzë.

Marketing