Sekreti i fitores së 17 të Ali Ahmetit

Zonja e zotërinj, mirëmbrëma! Maqedonia e Veriut ka votuar dje. Mbrëmë kishte pak a shumë rezutatet e zgjedhjeve, sot ka rezultat zyrtar të pakontestuar nga asnjëra palë, pavarësisht se COVID-19 vazhdon dhe bën të vetën në njërin prej shteteve ndër më të goditura në rajonin e Ballkanit.

Marketing

Gjithsesi, maqedonasit kanë votuar, kanë votuar mirë, ka pasur pjesëmarrje, nuk ka kontestim të rezultateve dhe ka një rezultat historik të shqiptarëve.

Për të biseduar mbi këtë rezultat, se si ka shkuar procesi zgjedhor dhe cila do të jetë qeveria e re e Maqedonisë së Veriut, kam kënaqësinë të kem në lidhje të drejtpërdrejtë sërish nga Tetova, kryetarin e BDI, kryetarin e partisë fituese të shqiptarëve të Maqedonisë së Veriut, z. Ali Ahmeti.

Çim Peka: Z. Ahmeti, mirëmbrëma!

Ahmeti: Mirëmbrëma Çim Peka!

Peka: Të falënderoj që gjete kohë në këtë ditë të ngarkuar. Fillimisht të uroj për rezultatin. 15 deputetë keni marrë krahasuar me 10 deputetë të zgjedhjeve të kaluara. Megjithëse kësaj radhe, sulmi ndaj jush ka qenë një target i pamohueshëm dhe i bërë publik. Z. Ahmeti! Çfarë ndodhi që partia juaj është rritur, as më shumë e as më pak, por është rritur me 50% të mandateve?

Ahmeti: Pavarësisht luftës që na shpallën – realisht ne kemi qenë përballë shtatë subjekteve të vetëm – të gjithë kundër nesh, por e forta është që populli ka qenë me ne dhe populli ka vlerësuar ato punë që kemi bërë. Nuk kemi bërë raporte të rreme, nuk kemi bërë as fushatë, por as edhe takime të ekzagjeruara gjatë raportimeve që kemi bërë brenda mandatit me qytetarët, me njerëzit dhe vërtet zgjidhje më të mirë sesa BDI, nuk ka qenë ndonjë zgjidhje, për t’u përcaktuar shumica dërrmuese e shqiptarëve, sepse ne kemi investuar në kuadro. Janë 14 vite investim, është investim kombëtar, janë shkolluar, janë përgatitur njerëzit dhe në universitete nga më të ndryshmet e Evropës, të Amerikës dhe unë jam përpjekur që një pjesë të tyre ta kthejmë në vendet e tyre, të mos mbetet vetëm propagandë apo dëshirë. Konkretisht, ata të vijnë të kontribuojnë dhe jemi dëshmuar në këtë drejtim. Dhe unë mendoj se edhe kjo ka qenë që njerëzit kanë vlerësuar punën që është bërë. Por tani e keqja është se ne kemi qenë të ndarë në shumë…

Peka: Do t’i diskutojmë të gjitha këto, por tani jemi tek rezultati. Z. Ahmeti, a prisnit ju realisht, pas kaq viteve në pushtet, të kishit një rritje me 50% të mandateve krahasuar me zgjedhjet e kaluara?

Ahmeti: Tani, ju mund të…Njerëzit mund të mendojnë, sidomos publicistët e analistët se nuk e kam menduar kështu, por në emisionin tuaj dhe në asnjë emision tjetër nuk e kam thënë, ndoshta dhe në një emision tjetër, në ‘21’ më duket, që do të kemi një fitore absolute. Nuk e di, a të kujtohet?

Peka: Më kujtohet shumë mirë!

Ahmeti: … dhe ma keni nxjerrë si me grep! Sepse nuk e kam pasur zakon të them ‘do të fitojmë, do të bëjmë’. Ne punojmë, ne hyzmetin do t’ia bëjmë, siç thotë populli. Tani të shohim njerëzit, se si do të vlerësojnë. Unë sot e kam pritur rezultatin me thënë të drejtën. Kam mundur edhe mirë. Kam mundur edhe më mirë, deputetin, mandatin e 16-të; është akoma në përpjekje e sipër…

Peka: Pra, nuk është mbyllur? Nuk është definitive 15 mandate? Keni akoma shpresë për të 16-in?

Ahmeti: Për mendimin tim, mandatet janë mbyllur. Tani është çështje e ankesave e kështu me radhë. Mbase mund të ketë ndonjë ndryshim.

Peka: Megjithatë, në qoftë se jeni rritur një gjysmë here, Aleanca për Shqiptarët është rritur nga 3 deputetë në 12, është rritur katër herë. Z. Ahmeti! Në qoftë se mbani mend emisionin e kaluar, megjithëse qenkeni shumë korrekt me to çfarë keni thënë, ju thashë dhe ju bëra një konstatim duke ju thënë se kam prova edhe me foto, se Partia Socialiste u investua shumë në zgjedhjet e kaluara dhe në mënyrë të veçantë, rinorët e kësaj partie, zyrtarisht me çadra, duke iu bërë thirrje shqiptarëve të votonin për Zoran Zaev. Kësaj radhe, zoti Rama është si karrige e këputur, është me ‘këmbë të këputur’, është në hallet e tij – nuk u përfshi në këto zgjedhje. A ka ndikuar mospërfshirja apo mos thirrja publike nga qeveria e Tiranës për të votuar Zoran Zaev në dyfishimin e mandateve? Në dyfishimin s’po them, por në rritjen me afërsisht 60% të mandateve të shqiptarëve në këto zgjedhje? Kujtoj: në zgjedhjet e kaluara, shqiptarët kanë marrë 20 deputetë, aktualisht janë me 32 deputetë.

Ahmeti: 34.

Peka: 34?! Janë 34 mandate shqiptarësh?

Ahmeti: Po, 34 mandate shqiptarësh.

Peka: …sepse mua këtu më del BDI me 15 deputetë; Aleanca për Shqiptarët me 12 deputetë që bëjnë 27; një deputet, PDSH, që bën 28 deputetë dhe 4 deputetë, Lëvizja Besa, që shkojnë në 32.

Ahmeti: Janë 4 mandate të Besës, plus 1 që është Nënkryetari i LSDM, shqiptar, bëhen pesë. Aleanca dhe Alternativa, 8 plus 4, që bëhen 12. Bashkimi Demokratik, 15 dhe Partia Demokratike Shqiptare, 1 mandat. Gjithsej, janë 34 mandate të shqiptarëve.

Peka: 34 mandate të shqiptarëve. A ka pasur ndonjëherë parlamenti maqedonas, 34 deputetë shqiptarë?

Ahmeti: Maksimumi ne kemi pasur 29 mandate.

Peka: Pra, ky është rekordi historik.

Ahmeti: Kjo është arritja më e madhe, por e ka bërë të vetën edhe dalja e ulët në pjesën lindore, ku në të kaluarën kishte dalje deri në 80 – 90%.

Peka: Pra, pjesëmarrja e ulët e pjesës së votave të maqedonasve.

Ahmeti: Po, kjo ka ulur edhe censusin.

Peka: Ka ulur edhe censusin. Shqiptarët kanë votuar masivisht?

Ahmeti: Shqiptarët po aq, dalja ka qenë si në gjitha ciklet zgjedhore, sepse manipulohet edhe me këto çështje, sikur gjoja shqiptarët e pakënaqur nuk dalin në zgjedhje e kështu me radhë. Por shqiptarët, gjysma e popullatës, nuk janë në vendbanimet e tyre, janë në mërgim…

Peka: Një lajm dhe një pyetje: shqiptarët nuk i ka trembur COVID-19, kanë marrë pjesë në zgjedhje fatmirësisht dhe mospërfshirja e faktorit politik në Shqipëri në këto zgjedhje, ka ndihmuar që votat e shqiptarëve të shkojnë për shqiptarët dhe jo për partinë e Zoran Zaev. Ky konstatim qëndron korrekt?

Ahmeti: Shihe! Për të qenë shumë korrekt, Shqipëria asnjëherë nuk ka ndërhyrë në zgjedhje në vendin tonë. Kanë qenë të paanshëm; tash unë nuk e di si kanë qenë të profilizuar …, ajo ndjenja e brendshme se kush, për kë ka dashur të fitojë, por asnjëherë publikisht nuk ka ndodhur që nga Shqipëria të anohen për njërën apo për tjetrën. Edhe ne jemi përpjekur të mbajmë linjat shtetërore. Ne na është dashur shteti shqiptar, pavarësisht se kush qeveris në Shqipëri, sepse ne na duhet shteti andej për shumë çështje. Ne kemi shumë çështje që duhet të mbyllen, qoftë si komb, qoftë si shtete. Kështu që nuk mendoj unë se ka pasur…

Peka: Z. Ahmeti, është intervista e dytë që unë kam bërë në jetën time me ju dhe ajo çfarë vura re nga intervista e parë dhe po shikoj tani, po e konstatoj, sigurisht që jeni politikan mjaft fin dhe shumë i kujdesshëm për të pohuar gjëra që në njëfarë forme dëmtojnë politikën këtu, por është fakt që në zgjedhjet e kaluara, Forumi Rinor Eurosocialist, me foto, ka ngritur çadra dhe ka bërë fushatë duke bërë thirrje që të votohej Zoran Zaev.

Është hera e parë në historinë e Maqedonisë, në zgjedhjet në Maqedoninë e Veriut, në atë kohë Maqedoni, që një parti politike nga Tirana bën thirrje për të votuar një parti maqedonase. Megjithatë, unë nuk dua t’ju mbaj më shumë në këtë pjesë, por fakti është: 20 deputetë në zgjedhjet e kaluara, 36 deputetë duke përfshirë edhe Nënkryetarin e partisë së Zoran Zaevit në këto zgjedhje, që është shqiptar. Nga 29 që ka rekordi i mandateve të shqiptarëve në parlamentin maqedonas.

Ahmeti: Plus pesë mandate.

Peka: Shumëkush e ka konsideruar një slogan populist thirrjen tuaj ‘Koha për kryeministër shqiptar’, por ja ku jemi sot. I gjithë lidershipi politik kosovar – në Shqipëri akoma nuk e kemi dëgjuar – ka bërë thirrje që shqiptarët pas këtyre zgjedhjeve, tashëm të jenë bashkë dhe këto mandate të përdoren në bllok. Ja ku jemi sot. Partia fituese është pak a shumë sa votat e shqiptarëve në Maqedoninë e Veriut. Duket teknikisht e mundur që të kemi një kryeministër shqiptar. Pas këtij rezultati, a keni filluar të komunikoni, si partia e parë, me të gjitha partitë shqiptare për të qenë bashkë si grup në parlamentin e Maqedonisë së Veriut?

Ahmeti: Unë kam komunikuar me pjesën dërrmuese të partive shqiptare ditën e sotme; i kam uruar për procesin e mbarë që ka shkuar, zgjedhor, ta lemë pas krahëve fushatën; të shohim, të bisedojmë, çfarë mund të bëjmë mirë për popullin tonë, për vendin tonë, kështu që të gjithë më kanë uruar për fitoren, me përjashtim të z. Sela, me të cilin akoma nuk kam biseduar dhe në të ardhmen do të ulemi, do të bisedojmë për strategjinë, për kërkesat për të cilat kanë dhe parti të tjera, por edhe ne. Kështu që të ndërtojmë një strategji të përbashkët, nuk them për të mbisunduar mbi partitë maqedonase. Kërkesat tona janë të arsyeshme, të ligjshme. Ne nuk duam…

Peka: E konsideroni kërkesë të arsyeshme dhe të ligjshme një kryeministër shqiptar me 36 mandate?

Ahmeti: Më shumë sesa të ligjshme, nuk di se si ta kualifikoj.

Peka: E arsyeshme?

Ahmeti: E arsyeshme! E ligjshme! E pritshme! 80% e shqiptarëve e presin kryeministrin shqiptar. Nga të gjitha anketimet që janë bërë. Kush është arsyeja që të mos jetë?!

Peka: Arsyeja që të mos jetë, janë votuesit maqedonas, që nuk presin dhe nuk duan një kryeministër shqiptar.

Ahmeti: Çfarë u ndodhi se Kryetari i Kuvendit të Republikës ishte shqiptar?! Vetë mrekullia ndodhi, e kemi nderuar vendin në qendrat ndërkombëtare, si në Uashington, si në Bruksel, me paraqitjet, me organizimin që ka bërë Kryetari i Kuvendit, zoti Xhaferri. Kemi nderuar shtetin, kemi nderuar të gjitha kombet që jetojnë këtu me Ministrin e Mbrojtjes, z. Fatmir Besimi, që ka qenë katër vite në një mandat të plotë. Kemi nderuar tërë shtetin, republikën, me Ministrin e Punëve të Brendshme që ka qenë shqiptar dhe ka menaxhuar situata shumë delikate, shumë specifike në vend. Unë kam pritur që ta përshëndesin kolegët e mi maqedonas këtë iniciativë kaq të guximshme, por edhe kaq të kontestueshme nga një pjesë e analistëve, nga një pjesë e politikanëve, por edhe vet kolegëve të mi maqedonas, duke filluar nga Zoran Zaevi deri tek partitë opozitare më të vogla.

Peka: Do të flasim për raportet tuaja me Zoran Zaevin dhe për qeverinë e re, por po ndaloj tek kjo që sapo më thatë pak më parë, se ishte interesante. Ju ka uruar Kryetari i PDSH, z. Menduh Thaçi besoj, keni biseduar me të?

Ahmeti: Kam biseduar me zotin Thaçi sot në mëngjes, më ka uruar natën e mbrëmshme dhe ka qenë një urim shumë i përzemërt.

Peka: Keni biseduar me Kryetarin e Lëvizjes Besa dhe ju ka uruar?

Ahmeti: Kam biseduar me zotin Bilal Kasami, Kryetar i Besës dhe kam biseduar sot në telefon.

Peka: Me zotin Sela s’keni biseduar akoma.

Ahmeti: Kam biseduar me zotin Afrim Gashi, Kryetar i Alternativës, më ka uruar gjithashtu dhe sigurisht që për çështje madhore kam përkrahjen e tyre. Gjithashtu nga ana ime, kurrën e kurrës nuk ka munguar përkrahja ime për partitë e shqiptarëve.

Peka: Le të kalojmë, pas urimit dhe pas kësaj panorame, të kalojmë tek pyetjet e vështira, zoti Ahmeti, që duke pasur parasysh intervistën e kaluar, sigurisht që do t’i bëni prapë të lehta. Ju, me sloganin, ‘Koha për një kryeministër shqiptar’ në Maqedoninë e Veriut, keni pasur parasysh një kryeministër shqiptar domosdoshmërisht i partisë suaj – apo koha për një kryeministër shqiptar që mund të jetë edhe nga parti të tjera shqiptare?

Ahmeti: Jo domosdoshmërisht, jo nga partia të cilën e kryesoj unë dhe zoti Naser Zyberi është i fushës së profesionit të vet ose ushtron detyrën e noterit, të avokatit. Para 18 vitesh është shkëputur nga politika dhe tani e ke dhe të vështirë të gjesh një njeri që nuk është angazhuar në një parti ose në ndonjë lëvizje të caktuar, por zoti Zyberi asesi nuk ka qenë i angazhuar në politikë. Bile, ka qenë herë pas here kritikues i Bashkimit Demokratik për Integrim dhe atje dukshëm, ka qenë një ndër komentatorët e ngjarjeve në televizionin Alsat.

Peka: Në qoftë se bëhet e mundur që të kemi një kryeministër shqiptar, kusht për për ju është të jetë zoti Zyberi si kandidat i shpallur…

Ahmeti: Përse edhe ju kaq skeptik jini: ‘në qoftë se bëhet e mundur’?! Ne nuk bëjmë hajgare, nuk bëjmë shaka me këto çështje!

Peka: Do t’jua them pak më vonë pse jam skeptik. E dëshiroj pa masë, por ta them pse jam skeptik, sepse dëshira është një gjë tjetër, edhe analiza një gjë tjetër. Në qoftë se bëhet e mundur të kemi një kryeministër shqiptar zoti Ahmeti, është kusht që të jetë vetëm zoti Zyberi, apo konjukturat dhe marrëveshjet politike ndërmjet partive shqiptare mund të sjellin në skenë edhe një emër tjetër?

Ahmeti: Ne do të bëheshim, si ta them, shumë të pabesë në qoftë se e kemi futur në një garë dhe i themi ‘tani kjo është situata, na fal, po njeri të do, tjetri s’të do’ dhe të vëmë interesat e grupeve të caktuara. Dhe kjo nuk do të ishte e ndershme për ne.

Peka: Është e vërtetë që e keni futur në garë dhe kjo është parimore, por e keni futur në garë pa një konsensus midis partive shqiptare.

Ahmeti: Unë jam përpjekur të vë kontakt me partitë shqiptare dhe në emisionin tuaj më duket se e thashë, zotin Veseli, që të bisedojë nëse mund të arrijmë një dakortësi. Së pari të bëhen bashkë partitë shqiptare në një bllok me qëllimin që të mos humbim zgjedhje, të mos humbim mandate për shkak të porciolizimit të votave, mirëpo kjo nuk u arrit dhe ne, domosdosdo, sot ishte momenti i duhur që të arrinim në një kërkesë të tillë.

Peka: Megjithatë zoti Ahmeti, se tani jemi në kuadrin e parashikimeve, kalkulimeve si mund të kemi një kryeministër shqiptar. Në qoftë se Zijadin Sela ju vë kusht që kandidati për kryeministër shqiptar të jetë i partisë së tij, për hir të 12 mandateve që ka, a do të ishte i gatshëm Ali Ahmeti dhe partitë e tjera shqiptare të bashkojnë votat në parlament për t’u bërë bllok për një kryeministër shqiptar të partisë së z. Sela, me kusht që kryeministri të mos jetë maqedonas?

Ahmeti: E para, nëse vjen puna që të mbështetem unë për muri dhe para meje janë shqiptarët, sepse shqiptarët janë shumë më shumë se çdo…

Peka: …çdo parti. Pra, nuk e përjashtoni?

Ahmeti: Unë jam i bindur se vetë zoti Sela nuk e bën këtë, sepse jo njëherë janë deklaruar që partia fituese tek shqiptarët duhet të jetë udhëheqëse dhe drejtuese e proceseve dhe jo njëherë janë deklaruar, kështu që nuk e besoj se edhe vetë Sela, cilido nga partitë, as zoti Gashi, as zoti Kasami, që mund të më vendosë me shpatulla për muri dhe o e bëjmë kështu, o ne nuk na ke pas. Kjo është një çështje që duhet ta shtyjmë të gjithë bashkë, është një vullnet i shqiptarëve. Por, e fundit, në qoftë se dikush mua më vendos me shpatulla për mua, unë e thashë, shqiptarët janë më shumë se gjithçka tjetër.

Peka: Ju kuptoj.

Ahmeti: Këto janë procese historike, këto janë procese të mëdha, gjërat këtu kanë shkuar mirë deri tani, por ka dhe shumë punë për t’u bërë, menaxhim të kujdesshëm…

Peka: A ju ka uruar kush nga lidershipi politik shqiptar, nga Tirana, për fitoren tuaj sot?

Ahmeti: Sot kam folur me Kryeministrin, sepse është bërë kështu… Me zotin Sali Berisha. Nuk mund të them më ish-Kryeministrin. Është bërë një farë dukurie tek ne ‘ish-presidenti, ish-kryeministri’, është ky, është ai. Ai ka qenë Kryeministër, ka qenë President i Shqipërisë dhe …

Peka: Keni biseduar me zotin Berisha?

Ahmeti: Po, sot, më ka uruar për fitoren në zgjedhje dhe kam biseduar me shumë miq, janë të shumtë.

Peka: Po me zotin Rama keni biseduar sot? Me zotin Rama?

Ahmeti: Zoti Rama më ka dërguar një urim në faqen time të komunikimit të brendshëm, që e mban partia.

Peka: Po me Presidentin Meta, veç urimit publik që ju ka bërë, keni biseduar me të?

Ahmeti: Me zotin Meta nuk kam pasur mundësi sot të lidhemi, por me siguri që përderisa e ka bërë edhe publik, jemi në komunikim.

Peka: Po ju pyes për emra konkret, pasi dua të di sa mund të përfshihet lidershipi politik në Tiranë për t’i bërë bashkë 36 mandatet e shqiptarëve në parlamentin e ri të Maqedonisë së Veriut. A keni shpresë apo nuk e prisni një gjë të tillë?

Ahmeti: Unë mendoj se ka aq pjekuri këtu tek partitë politike në Maqedoni për çështje madhore, siç është çështja për të cilën ne do të përballemi brenda javës që të arrijmë të dakordohemi për pikat substanciale, për çështjet që kanë të bëjnë këtu dhe nuk mendoj se nuk do të ketë asnjë arsye të fortë për të marrë energji, për t’ua humbur energjinë , drejtuesve shqiptarë, qofshin ata në pozitë apo në opozitë. Por nëse kërkohet, asnjëri nga ata nuk do të kursehet për të ndihmuar.

Peka: Zoti Ahmeti, kalojmë tani tek termat konkretë të formimit të qeverisë së re, pas këtyre zgjedhjeve, në Republikën e Maqedonisë së Veriut. Parti fituese është, në mos gabohem, me 44 deputetë, si parti është partia e ish-kryeministrit Gruevski. Me 42 deputetë është partia e z. Zaev, por në koalicion me Besën, partia e z. Zaev shkon në 46 deputetë. Me Kushtetutën e Republikës së Maqedonisë së Veriut, kush mandatohet i pati, partia e parë apo koalicioni i parë? Pra, e thënë, ish-shefi i opozitës maqedonase, i VMRO apo…?!

Ahmeti: Afati është tashmë i hapur, duket se është 20 ditë, partia fituese. Partia e parë duhet të dorëzojë tek kryetari i shtetit, listën me 61 mandate. Ai që i dorëzon 61 mandate, ai e merr përsipër konstituimin e qeverisë së re. Partia e parë. Nëse partia e parë nuk e bën brenda 20 ditësh, atëherë ajo parti, e cila i bën 20 mandate, e merr, fiton mandatarin dhe bën qeverinë, konstituon qeverinë.

Peka: Pra, partia e parë. Ju keni parasysh VMRO apo LSDM?

Ahmeti: Këtu, numrat, VMRO, LSDM, janë: 46 mandate ka LSDM; 44 mandate ka VMRO.

Peka: LSDM tek 46 mandatet, ka dhe 4 të Besës, është koalicon.

Ahmeti: Po po, por koalicione me parti të vogla kanë të dy palët. Edhe VMRO.

Peka: Ju kuptoj.

Ahmeti: Mirëpo, sipas informative të fundit që kam, 2 mandate që i ka fituar e majta, i bashkohen VMRO. Kjo do të thotë që dy partitë maqedone bëhen 46 me 46.

Peka: Interesante shumë. Pra, dy partitë maqedone kanë një rezultat të barabartë dhe është akoma e paqartë kush do të mandatohet e para për të bërë qeverinë.

Ahmeti: Tani do të varet shumë nga negociatat. Unë jam shumë i qetë dhe nuk kam asnjë shqetësim.

Peka: Që jeni shumë i qetë kjo duket. E pashë edhe tek intervista e parë. Nuk kam intervistuar në jetën time ish-luftëtar që të jetë kaq i qetë dhe kaq i matur. Madje, aq shumë jeni i qetë (qesh) sa që më bën të dyshoj a keni qenë në luftë.

Ahmeti: (Qesh). Luftën nuk e fitojnë ata që janë zjarr e flakë e tym në kokë. E fitojnë ata që zjarr e kanë zemrën dhe kokën akull. Këta e fitojnë luftën.

Peka: Zoti Ahmeti. Cila nga partitë maqedonase ju ka telefonuar, ju ka kontaktuar sot për t’ju pasur pjesë të koalicionit të tyre?

Ahmeti: Jo, nuk kam asnjë telefonatë nga parti maqedone. Nga krerë e tyre, se kështu… sepse ne e kemi krijuar tani, në 18 vite, kemi komunikime dhe jashtë krerëve të partisë. Më kanë uruar nga të dyja kampet. Edhe nga kampi socialdemokrat, edhe nga kampi i VMRO-DPMNI.

Peka: Pra, kanë filluar kontaktet që sot?

Ahmeti: Do të thotë më kanë uruar dhe nuk është hapur çështje e koalicioneve, bashkëpunimeve. Nuk është kjo temë. Por më kanë uruar.

Peka: Unë lexova në mediat shqiptare në Maqedoninë e Veriut sot se partia juaj, BDI, me 15 deputetë, do ta kushtëzojë koalicionin me një mandat dyvjeçar për një kryeministër shqiptar: dy vjet kryeministri maqedonas dhe dy vjet, kryeministri shqiptar. Më thoni, është i vërtetë ky lajm apo është aludim?

Ahmeti: Më duket se keni filluar të reflektoni edhe ju skeptikët. (Qesh).

Peka: (Qesh). Reflektimi në këtë rast është shumë i mirë. Mjafton që Maqedonia të ketë qoftë edhe për një vit, një kryeministër shqiptar. Pra, është një alternativë e mundshme?

Ahmeti: Por këtu nuk jeni ju ai skeptiku. Ju pak jeni shprehur. Ka shumë skeptikë të tjerë. Po me këtë që e thatë ju, bëni një goditje që skeptikët e humbën betejën.

Peka: Akoma jemi në kuadrin…dakord me rezultatin, por akoma jemi në momentin e mundësive të ndryshme.

Ahmeti: Po.

Peka: Është më e besueshme se para zgjedhjeve, patjetër…

Ahmeti: Ne duam të jemi të arsyeshëm, që shtetit t’i krijojmë mundësinë të organizohet më mirë, jo për të krijuar përplasje, telashe në shtet, sepse ne kemi filluar, kemi hapur negociatat për anëtarësim në Bashkimin Evropian, ne jemi vend anëtar i NATO. Me shqetësim kam përcjellë, mbrëmë dhe sot, ndërhyrjet që janë bërë, sulmin kibernetik bërë Komisionit Qendror Zgjedhor, që do të thotë se akoma ne jemi në shënjestër të të gjithë atyre që këtë vend nuk duan ta shohin në rrugë të mbarë dhe mendoj se partitë maqedonase, si LSDM, si VMRO, e kanë provuar me ne që ne vërtet jemi shtetformues, që ky shtet të ndërtohet dhe të ecë përpara bashkarisht, sepse të ardhme tjetër nuk ka. Edhe më vjen mirë që ata gjithmonë e më tepër po e forcojnë këtë bindje dhe përgjegjësitë për mbarëvajtje të punëve në këtë shtet dhe fatet e këtij shteti vërtet janë në duart e dy komuniteteve më ët mëdha: të komunitetit maqedonas dhe atij shqiptar. Dhe të gjitha shpresat, komunitetet më të vogla i kanë tek ne, komunitetet më të mëdha dhe ne duhet të sillemi me përgjegjësi e jo me euforizëm, as me folklorizëm dhe unë nuk e kam vendosur çështjen e kryeministrit si një çështje folklorike. E kam vendosur një çështje të arsyeshme për të demonstruar që ne shqiptarët jemi shtetas të këtij shteti. Ky shtet është edhe yni dhe ne duam ta demonstrojmë vullnetin tonë në drejtimin e këtij shteti. Unë kam pritur dhe jam i zhgënjyer nga kolegët e mi maqedonas që aq shumë hynë në panik kur unë e kam shpalosur idenë.

Unë po të isha në vend të tyre, do ta përshëndesja, do t’i përgëzoja për guximin, sepse në këtë vend regjimet, gjithmonë i kanë mësuar edhe edukuar njerëzit që ‘ej, ju, ky vend nuk është juaji. E dini ku e keni vendin?! Ju jeni nga Shqipëria, po keni ardhur ju këtu’ e ekspedita të tëra, Beogradi, Podgorica dhe Shkupi kanë bërë, me akademikë Mileska e Milevska – mos të hyjmë në histori tani – për t’i bindur shqiptarët që janë ardhacakë në këto troje. A e shihni si e ke plisin?! A e shihni si e kam unë këtu plisat?! Njeri rrafsh e dy të tjerët janë me kulm! Për t’i bindur ata që ky i rrafshëti ka ardhur diku nga Luma, nga Dibra, nga atë anë e kufirit deri në Mirditë andej e Mat. Ju jeni matjanë e jeni kështu e jeni ashtu. Në 2001-in e këndej unë kam pasur vështirësi për të shpjeguar Marrëveshjen e Ohrit. ‘Ore njerëz! Zgjidhje më të mirë nuk ka! Kjo është zgjidhja në dobi edhe të maqedonasve, edhe të shqiptarëve, edhe të atyre që jetojnë këtu.’ Sepse po t’i hyjmë ndarjes, ndarja ishte e dhimbshme, ishte tragjike për të dy palët. Kështu që zgjidhja më e mirë është që bashkë të jemi në NATO, bashkë të jemi në Bashkimin Evropian. Ky është bashkimi dhe i shqiptarëve, dhe i atyre maqedonasve që kërkojnë Egjeun dhe Maqedoninë e Epirit. Të gjithë do të jemi: nga Athina deri në Norvegji e Suedi, Skandinavi, të gjithë do të jemi bashkë.

Peka: Z. Ahmeti! A do të jetë e mundur teknikisht, që me këto shifra që kemi, njëra prej partive maqedonase ose thënë më saktë, LSDM, të ndërtojë qeveri me shqiptarët pa votat tuaja?

Ahmeti: Nuk ka as teorikisht.

Peka: Nuk ka as teorikisht, nuk bëhen dot 16 deputetë.

Ahmeti: Jo, nuk bëhen. Dhe nëse bëhet, nuk qëndron. Si do të qëndrojë?! Bashkimi Demokratik është partia që ka investuar dhe ka dhënë më shumë për stabilitetin dhe progresin në vend, në procese tepër tepër të rëndësishme. Le t’i lëmë ato përralla ne ‘ishte ky që vendosi, ishte ai që vendoi’.

Peka: Argumenti dhe logjika është një gjë tjetër – matematika dhe pragmatizmi politik është një gjë tjetër. Bëhen 61 deputetë të LSDM dhe partive të tjera shqiptare pa partinë tuaj?

Ahmeti: O Çim! E ka provuar VMRO në 2016-ën këtë punë. Për 15 muaj, në dy gjunjët ra. Nuk bëhet këtu pa parti fituese shqiptare, sepse gjërat kanë ndryshuar dhe tanimë kanë ndryshuar në favor të shqiptarëve në këto hapësira dhe kërrkush nuk rrezikon të bëjë diçka pa shqiptarët.

Peka: Nuk e kam të qartë Kushtetutën e Republikës së Maqedonisë së Veriut: a munden dy partitë maqedonase të ndërtojnë një qeveri pa pakicat? Pa shqiptarët?

Ahmeti: Si do ta bëjnë?!Po nuk funksionoi shteti, nuk funksionon Kushtetuta. Nuk funksionon parlamenti. Sepse çdo i dyti ligj është me votim të dyfishtë. Si do të funksionojë parlamenti?! As teorikisht nuk ka formulë që mund ta arsyetojë këtë parim që thoni ju. As teorikisht. Shteti funksionon mbi parimet e ‘banditerit’.

Peka: Megjithatë është e qartë, me aq sa e njoh unë politikën në Maqedoninë e Veriut, VMRO në asnjë rast – do të ishte e gatshme të rrinte në opozitë – por kurrsesi të ndante mandatin përgjysmë me kryeministrin shqiptar, sepse është një parti më nacionaliste. Ajo çfarë mund, në qoftë se ndodh, do të ishte opsion që të merrej në konsideratë, këtë gjë mund ta bënte LSDM po them unë. Por pas replikave të zotit Zaev ndaj jush, domethënë ndaj akuzave të z. Zaev ndaj jush, ‘akuza’ po them – dhe replikave tuaja nga ky emision ndaj z. Zaev, i cili tha se ‘Ali Ahmeti, BDI do të jetë në opozitë’, ju më thatë se z. Zaev ‘pas dy gotave nuk e di çfarë flet, por kur kthjellohet është i qartë’. A do të ndikojnë këto replika gjatë fushatës në një aleancë të mundshme apo në qëllimin tuaj për një kryeministër shqiptar?

Ahmeti: Sami Frashëri është shumë i madh dhe ka një thënie shumë të bukur, ‘asnjëherë mos gabo ndaj të tjerëve. Le të gabojnë të tjerët me ty dhe kur të takohesh, mos u skuq ti, po le të skuqet ai’. Unë, asnjë njeri nuk kam sharë në këtë fushatë. Tri-katër herë i kam çuar porosi z. Zaev që në fillim të deklaratave të tij, pak a shumë fyese për Bashkimin Demokratik për Integrim: ‘Mos e bëni këtë, se katër vite kemi qenë bashkë. Kemi bërë punë të mira bashkë. Kemi pasur edhe dallime, po kemi pasur edhe hatërmbetje, por ato kanë minore krahasuar me punët. Ky vend në NATO ka hyrë, ky vend ka hapur negociatat për në BE. Ky vend ka bërë ligjin e gjuhës shqipe. Shqipja është gjuhë zyrtare në këtë vend. I kemi bërë bashkë këto punë. Lëri këto për interesa të ngushta, për një mandat apo për dy mandante. Pas tre porosish që i ka marrë, përsëri ka vazhduar. Dhe nuk më ka mbetur hatri mua, se nuk është Zoran Zaevi që më çonte në opozitë , që ‘këndonte’ përditë. Populli më çon në opozitë dhe populli ishte me mua, jo me Zoran Zaevin. Votuesit e mi ishin me mua dhe jo me Zaron Zaevin. Më mbeti hatri që në përgjimin që doli ai tha …

Peka: Pikërisht tek përgjimi.

Ahmeti:…’shqiptarët nuk vlejnë për pesë para’. Kjo më preku pa masë. Por më shumë më preku që nuk pati reagim kombëtar nga intelektualë, nga analistë, nga publicistë, se eshtrat deri në varr na i ka fyer. Këtu mua më mbeti hatri.

Peka: Pati reagim në votë, sepse shqiptarët siç duket u bashkuan dhe ndikuan dhe këto përgjime, edhe këto deklarata, për t’u bërë bashkë. Për të votuar shqiptarët shqiptarët më shumë se asnjëherë tjetër.

Ahmeti: Nuk e kam pritur prej Zoranit, nuk e kam pritur dhe me siguri, nuk e di se si do ta ndiejë ai vetën kur të dalë para meje. Për mua janë këtu mbi 17 mijë përgjime, ‘file’ që janë të përpunuara; janë mbi 100 mijë që janë të papërpunuara por janë të dëgjuara dhe në asnjë mënyrë që unë të fyej bashkëqytetarët e mi maqedonas. Sepse po të kishte nga 117 mijë përgjime, sigurisht që ato do të merrnin skajin e botës deri në Australi e Kanada, ato përgjime. Por nuk ka gjëra fyese, ofenduese, për bashkëqytetarët e mi maqedonas, por nuk ka asgjë në drejtim të keqpërdorimit apo të veprimit mbas shpine të partnerëve me të cilët unë kam bashkëqeverisur për 18 vite.

Peka: Sapo u shprehët ndaj deklaratës së Zoran Zaev se ‘shqiptarët nuk vlejnë as pesë pare’, se na i ka prekur ‘edhe eshtrat në varr’! Si mund të bashkëqeverisni me një njeri të tillë që ju ka fyer dhe denigruar në këtë formë?! Nuk është se ju ka fyer ju personalisht, ka fyer 30% të popullsisë së Maqedonisë.

Ahmeti: Po po, ai ka fyer shqiptarët, dhe jo vetëm shqiptarët e Maqedonisë. Por si komb. Dhe kur flitet për shqiptarët…nëse unë shitem për pesë para këtu, apo se nuk më kuptuan këtu, për pesë aspra dhe nuk e dinë që asprat kanë qenë monedha para Pavarësisë së Shqipërisë, që janë shitur dhe janë blerë për 5 aspra, njerëz, kanë vrarë apo kanë spiunuar atdhetarë dhe patriot shqiptarë, unë do të skuqem kur do të takohemi.

Peka: Megjithatë ka një tezë. Ato përgjime janë publikuar qëllimisht! Pra janë strateget e fushatës së z.Zoran Zaev për të rritur numrat e maqedonasve që do të votonin për partinë e tij, sepse perceptohej se u kishte dhënë shumë, shqiptarëve. A mendoni se ishte një strategji e z. Zaev për t’u thënë maqedonasve ‘shiko, unë shqiptarët i konsideroj si ju, por pragmatizmi politik është gjë tjetër’?!

Ahmeti: Nuk e kuptova.

Peka: A mendoni se ato përgjime i ka nxjerrë vet Zoran Zaev për t’u dhënë një mesazh qytetarëve maqedonas ‘më votoni, se unë jam po aq antishqiptar sa edhe partia tjetër’?

Ahmeti: Nuk e di, nuk e di prapavijën, por njeriu shprehet ç’ka ka në brendi, në biseda kështu kokë më kokë, me miq, me shokë, por jo dhe në konferenca për shtyp.

Peka: Jemi në fund. Në fakt, po më shkruajnë pa fund nga Maqedonia e Veriut, shqiptarë të Maqedonisë së Veriut, analistë dhe publicistë skeptikë, por më thonë që është e vërtetë që z. Ahmeti nuk ka fyer në përgjime maqedonasit, por ka fyer pa fund shqiptarët! Është e vërtetë?

Ahmeti: Edhe këta janë ata që bëjnë shpifje. Kjo është bisedë tërësisht private edhe me siguri të ka ndodhur edhe ty që të shash ndonjëherë dikë në telefon. Të ka hidhëruar dikush, sidomos Edi Rama dhe me dikënd tjetër e je hidhëruar.(Qesh)

Peka: Jo, z. Rama unë e shaj edhe publikisht, jo vetëm në telefon. Domethënë jo vetëm e kundërshtoj…por ka një moment: nëse këtë gjë e ka bërë një shqiptar për shqiptarët, edhe biseda e z. Zaev është një bisedë private.

Ahmeti: Jo, e imja është krejt natyrë tjetër dhe unë nuk kam sharë shqiptarë. Po të gënjejnë që të japin ato informacione. Merre dhe dëgjoje. Çfarë kam folur unë Çim, më lehtë në tregun e pazarit gjen përgjime për mua dhe të gjithë bashkëpunëtorët e mi, sesa fruta.

Peka: Qartë. Tani po bëj ndërmjetësin, ndërmjet skeptikëve të shqiptarëve në Maqedoninë e Veriut dhe jush. Më thonë se ka telefonatë ku keni sharë pronarin e TV Alsat që është shqiptar.

Ahmeti: Mund të kenë diçka, nuk e kam dëgjuar. Po në qoftë se e kanë, pse nuk e lëshojnë?!

Peka: E qartë.

Ahmeti: Pronarin e TV Alsatit e kam pasur mik shumë të mirë dhe babai i tij amanet ma ka lënë djalin, që të kujdesem si djalë i ri, jo shumë i pjekur sa duhet. Këto janë fjalë të babait të tij, jo të miat.

Peka: Kuptoj. Gjithsesi, jemi në fund. Në kohën që shqiptarët e Maqedonisë së Veriut dhanë një model demokracie e civilizimi me pjesëmarrje të lartë vote fantastike pro shqiptarëve, Presidenti i Kosovës prej pesë ditësh, ish-bashkëluftëtari juaj, po del me çantë në shpinë çdo ditë nga Gjykata Speciale e Hagës, ku po pyetet për rreth 6 orë. Pra, është momenti më delikat për Kosovën pas Pavarësisë. Si ndihet Ali Ahmeti dhe a ka një parashikim si do të jetë fati i Presidentit Hashim Thaçi? Në këtë studio keni thënë që nëse ka akuzë ndaj UÇK, përgjegjësia është e të parit të ushtrisë.

Ahmeti: Sigurisht që ne duhet të përgjigjemi në të gjithë situatat, dhe unë jo vetëm mendoj, por jam shumë i sigurt që z. Thaçi do ta mbarojë të gjithë atë dokumentacion mbi konventat ndërkombëtare për luftërat, sepse ne asnjëherë s’kemi dhënë urdhër për t’ju revanshuar palës që bënte krime, kërdi, mbi popullatën e pafajshme dhe asesi s’është dhënë asnjë urdhër, as me gojë, as i shkruar, për t’iu kundërvënë me të njëjtën monedhë. Unë besoj se edhe në këtë gjyq do të dalë triumfuese, Ushtria Çlirimtare e Kosovës.

Peka: Pyetja e fundit. Z Ahmeti, si e bëni të mundur që pas 18 viteve në pushtet partia juaj nuk rrudhet, nuk konsumohet, por shtohet?! Janë shqiptarët më fanatikë ndaj një partie?! Nuk e njohin mirë politikën, liderët e tjerë politikë shqiptarë të Maqedonisë së Veriut apo keni ndonjë aftësi tjetër që ne nuk ua njohim?! Sepse është një rast i paprecedentë: një parti në pushtet që vetëm shton votat.

Ahmeti: Çim! Kjo është një temë shumë filozofike, është një temë që duhet edhe shkencëtarët të merren. Unë do të them një moment si e mendoj…

Peka: Duhet të merren shkencëtarët me rezultatin e partisë tuaj?!

Ahmeti: Sigurisht, 18 vite të fitosh e tani bëhen 22 vite.

Peka: 22 vite!

Ahmeti: Po, me këtë mandat, 22 vite fitore. Pra, janë 17 cikle zgjedhore që kam fituar për 18 vite. Jo unë vetë, sigurisht, trimi i mirë me shumë shokë, është.

Peka: Partia juaj, sigurisht që ju.

Ahmeti: Por, unë mendoj që unë jam marrë me çështjen, të tjerët më kanë sharë mua. Për atë kanë humbur. Unë nuk kam sharë njeri. Unë gjithmonë i kam thirrur në komunikim dhe bashkëpunim.

Peka: Pra, nuk jeni marrë me rivalët, por jeni marrë…

Ahmeti: Jam marrë me punët e partisë sime, jam marrë me obligimet që kemi marrë karshi qytetarëve. A mund të dalim përpara tyre? A do të skuqemi përpara tyre? Për 18 vite për çdo vit nga dy herë dal përpara qytetarëve, njerëzve, komunikoj me ta, shumë afër. Ka njerëz që edhe të fyejnë, ka njerëz që edhe hidhërohen. Ata janë hallexhinj. A të tregoj diçka? Një moment ka ndodhur kur po flisja për NATO, për Bashkimin Evropian, isha në një zonë malore dhe u ngrit një fshatar e më tha:

– O Ali Ahmeti!

– Urdhëro, bacë, – i thashë.

– O, mua më ka cof lopa. A ka mundësi të ma shpëtosh lopën tjetër?!

Unë flisja për NATO dhe Bashkimin Evropian, ai kishte hallin e lopës! Nuk kishte hallin e NATO! Dhe i kam thënë Besnik Jasharit, ishte sekretar i shtetit dhe mjek. I them ‘Besim, të lutem, t’ia shpëtojmë lopën’ dhe ia shpëtuam! Halli i tij, ai ishte. Më thotë, njerëzit tanë, partitë, politikanët mund të jenë dhe të pakapshëm për njerëzit, unë bie dhe në këto nivele që t’i dëgjoj ata.

Peka: Z. Ahmeti, fituesi vetëm urohet. Gjithashtu përveç urimit për këtë rezultat, të falënderoj për gatishmërinë për intervistën dhe uroj që në intervistën tjetër, skepticizmi im të ketë rënë dhe të kemi një kryeministër shqiptar.

Ahmeti: (Qesh) Unë të uroj për paanësinë që ke pasur sepse…

Peka: Të falenderoj.

Ahmeti: …sepse më thanë që me Çimin do të përplasesh keq. E them, unë i dua dhe kam konsideratë për ata me të cilët përballem, Kështu që të falënderoj shumë nga zemra për paanësinë dhe profesionalizmin që ke treguar në dy emisione, jo vetëm unë, por edhe bashkëpunëtorët e mi të tjerë që kanë pasur paraqitje në televizionin tuaj. Të uroj për paanësi dhe për profesionalizëm.

Peka: Unë të falënderoj shumë e të uroj për fitoren!

Kam pasur në lidhje të drejtpërdrejtë nga Tetova, fituesin e zgjedhjeve nga partitë shqiptare në Maqedoninë e Veriut, z. Ali Ahmeti.

Në fakt, një rezultat spektakolar i shqiptarëve në 36 mandate, për herë të parë në historinë e zgjedhjeve të këtij vendi, pra të një ish-republike jugosllave ku maksimumi ka qenë 29 e sot kemi 36 mandate shqiptarësh.

E në fakt, dhe për ne skeptikët, z. Ahmeti këtu kishte të drejtë, skepticimi ka rënë, ekziston akoma. Shqiptarët mund të kenë kryeministrin e tyre për herë të parë në Maqedoninë e Veriut, sepse janë pothuajse të barabartë nëse i bashkojnë votat, mandatet, me partinë e parë maqedonase.

Marketing