Singapori sapo ka filluar të marrë nën kontroll valën e dytë të koronavirusit. Por, tani po bëhet gati për t’u përballur me shpërthimin më të keq të një infeksioni tjetër viral, dengo ose ethet tropikale
Më shumë se 14,000 raste janë raportuar në Singapor që nga fillimi i vitit, sipas Agjencisë Kombëtare të Mjedisit. Numri i përgjithshëm për të gjithë vitin pritet të tejkalojë 22,170 rastet e raportuara në 2013 – shpërthimi më i madh i dengos në historinë e Singaporit, tha agjensia.
Dengo është një infeksion viral i transmetuar nga mushkonja Aedes, i njëjti insekt përgjegjës për përhapjen e Zika, etheve të verdha. Zakonisht gjendet në rajone të nxehta dhe të lagështa të tropikëve dhe subtropikëve gjatë muajve me shi.
Vetëm rreth 25% e atyre të infektuar tregojnë simptoma, të cilat përfshijnë ethe të larta, dhimbje koke të forta, dhimbje të muskujve dhe nyjeve. Rastet ekstreme mund të sjellin gjakderdhje, vështirësi në frymëmarrje, dështim të organeve dhe vdekje të mundshme.
Në Singapor, 16 njerëz kanë vdekur nga dengoja këtë vit – dyfishi i numrit të vdekjeve të 2013-ës.
Muajt më të ngrohtë nga qershori deri në tetor janë sezoni tradicional i pikut në Singapor, për shkak të zhvillimit të përshpejtuar të mushkonjës Aedes dhe periudhës më të shkurtër të inkubacionit të virusit Dengo.
Por këtë vit, ai ka qenë veçanërisht i rëndë.
Dhe duke filluar nga 15 korriku, agjensia do të rrisë gjobat për njerëzit që dështojnë të ndërmarrin masa për të parandaluar që mushkonjat të mos shumohen brenda dhe jashtë pronës së tyre. Mushkonjat dihet se preferojnë lagështirë, qoshe të errëta dhe zona me ujë të ndenjur.
Rastet e etheve tropikale janë rritur në mënyrë dramatike në të gjithë botën, duke u rritur 30 herë në 50 vitet e fundit. Ekzistojnë rreth 100-400 milion infeksione çdo vit, dhe rreth gjysma e popullsisë së botës tani është në rrezik, sipas Organizatës Botërore të Shëndetit.
Shkencëtarët thonë se moti më i nxehtë dhe i lagësht i sjellë nga ndryshimi i klimës ka krijuar kushte ideale për mushkonjat femra për të vendosur vezët e tyre. Jo vetëm që ka më shumë mushkonja, por urbanizimi i shpejtë që ndodh në shumë kombe aziatike do të thotë që popullsitë po jetojnë në kontakt më të ngushtë me insektet që mbartin sëmundje.
Vitin e kaluar, Filipinet shpallën një epidemi kombëtare të dengos në gusht. Në fund të këtij muaji, 1,107 njerëz kishin vdekur nga sëmundja, dhe më shumë se 270,000 ishin infektuar.
Në Singapor, ekspertët besojnë se një arsye kryesore për rritjen e rasteve të dengove këtë vit është kthimi i një lloji të vjetër të virusit dengo që nuk ka qenë për gati tre dekada.
Ekzistojnë katër lloje, të virusit dengue. Në Singapor, DENV-2 ka qenë mbizotëruese që nga viti 2016. Por duke filluar nga viti i kaluar, DENV-3 ka qenë në rritje, sipas Luo Dahai, profesor i asociuar i Infeksionit dhe Imunitetit në Universitetin Teknologjik Nanyang.
“Duke marrë parasysh shpërthimet lokale zakonisht shkaktohen nga DENV1 dhe 2, imuniteti i ndërtuar midis banorëve të komunitetit kundër këtyre DENV-ve mund të mos jetë mbrojtës ndaj DENV-3 në zhvillim,” tha Luo.
