Thaçi për dialogun: Momentumi për marrëveshje është tani

Presidenti Hashim Thaçi, në një intervistë për Agjencinë e Lajmeve të Austrisë “APA“, ka folur për zhvillimet politike në Kosovë dhe rajon.

Thaçi ka thënë se një marrëveshje mes Kosovës dhe Serbisë do të krijonte më shumë paqe dhe stabilitet në rajon.
“Për Kosovën dhe Serbinë kjo do të mundësojë anëtarësimin në BE, derisa për Kosovën edhe në NATO”.

“Nuk do të ketë kufij monoetnik dhe të dyja shtetet do të jenë shumetnike. Arritja e një marrëveshjeje ligjërisht obliguese, nënkupton që nuk do të ketë më kurrë luftë ndërmjet dy shteteve”, tha Thaçi.

Thaçi tha se qytetarët e të dyja vendeve do të kenë një jetë më të mirë, sepse nga jetësimi i marrëveshjes do të përmirësohet edhe gjendja ekonomike dhe do të krijohen më shumë vende të punës, derisa kufijtë do të largohen, duke u bazuar në modelin evropian.

“Shansi për të arritur një marrëveshje të tillë asnjëherë nuk ka qenë më i mirë, sepse kemi mbështetjen e BE-së dhe SHBA-së”.

“Risia është që edhe Rusia do të jetë në gjendje të pranojë marrëveshjen, nëse të dyja palët pajtohen. Prandaj, është me rëndësi që të shfrytëzohet ky momentum për të arritur një marrëveshje të balancuar, e cila merr parasysh interesat e dy vendeve”, tha Thaçi.

Presidenti tregoi se në të kaluarën nuk ka pasur një gatishmëri të tillë dhe se nëse nuk e shfrytëzojnë këtë rast,qytetarët e dy shteteve do të mallkojnë udhëheqësit e tyre në dekadat e ardhshme.

“Kjo marrëveshje nuk ka të bëjë vetëm me korrigjimin e kufijve, por edhe me aspekte të tjera. Kjo marrëveshje do të jetë gjithëpërfshirëse, e cila trajton edhe çështje të tjera, si çështjen e personave të zhdukur nga lufta e fundit, të cilët edhe më tutje nuk janë kthyer në vendlindje”.

“Marrëveshja ka për qëllim të zgjidhë përfundimisht problemet dhe të mos jetë një zgjidhje e përkohshme, të cilës pastaj duhet t’i rikthehemi. Nuk do të ketë as “Shqipëri të madhe”, as “Kosovë të madhe”.

“Në vend të kësaj, ne synojmë integrimin e rajonit në Evropën e bashkuar. Në këtë intervistë kam folur edhe për ushtrinë e Kosovës. Ky ishte një vendim i duhur i një shteti sovran, i bazuar në vullnetin e popullit të Kosovës”, ka thënë Thaçi në intervistën e tij për APA.