Kostoja e shtrenjtë e kredive të shpejta, kompensimet për kyçjen e serishme në rrjet pas shkyçjes së telefonit, borxhet e mbetura dhe problemet me faturat për komunalet e ndryshme si ato për rrymën dhe ngrohjen qendrore , orë-matëset e prishura të ujit… janë vetëm një pjesë e ankesave që qytetarët kanë parashtruar në vitin e kaluar ndaj Organizatës së Konsumatorëve të Maqedonisë. Ankesa ka pasur edhe me ndërrimin e prodhimeve të ndryshme të teknikës së bardhë, si dhe këpucëve dhe veshmbathjeve të ndryshme, shkronjat e imëta në deklarimet e prodhimeve, shkruan gazeta KOHA.
Nëse bëhet një krahasim me vitin 2017, mund të vërehen ngjashmëri të mëdha në llojin dhe natyrën e ankesave të konsumatorëve me vitin 2018. Telefona dhe mobilje jocilësore, probleme të ndryshme me llogaritë e telefonisë celulare, llogaritë paushale dhe pagesa e borxheve të vjetra për rrymën , ngrohjen dhe ujin, ushqime me afat të skaduar kanë qenë ankesat kryesore të konsumatorëve në Maqedoni në vitin 2017.
Nga ana tjetër, vetëm vitin e kaluar, qytetarët lidhur me faturat për shërbimet e ndryshme janë publike, janë ankuar më së shumti tek operatorët celularë lidhur me kompensimin që paguhet për kyçjen e serishme në rrjet nëse konsumatori ka qenë i shkyçur për shkak të mos pagesës së llogarisë, si dhe për mbulimin cilësor me rrjet të operatorit celular, si dhe për shkak të pakënaqësisë së shërbimit të ofruar pas kalimit nga tarifa e vjetër në tarifë të re.
Lidhur me shërbimet e ndryshme të komunaleve, ankesa ka pasur edhe për harxhimet paushale që paguhen për energjinë elektrike dhe ngrohjen qendrore, si dhe me pagesën e borxheve të vjetra. Shpesh, në rajone të caktuara janë paraqitur edhe ndërprerje të shpeshta në furnizimin me rrymë. Ndër ankesat më të shpeshta në këtë kategori janë edhe ato për pamundësinë e gjetjes së gjuhës së përbashkët për larjen e borxheve të vjetra si dhe për funksionimin e rregullt apo të aparatit të prishur që mat harxhimin e ujit. Nga Organizata e Konsumatorëve të Maqedonisë apo OKM thonë se mosleximi i rregullt i aparateve matës ka ndikuar në numrin e madh të llogarive paushale që sipas pohimeve të vetë konsumatorëve janë shumë më të larta se konsumi mesatar familjar.
Konsumatorët thonë se janë të shumta problemet me servisimin e telefonave celularë ku shpesh bëhet fjalë për servisimin e prodhimit të njëjtë edhe për më shumë se tre herë për të cilin problem teknik konsumatorët pohojnë se ka gabim prodhimi apo të fabrikë. Nga ana tjetër, tregtarët insistojnë që të ndreqet prodhimi në kuadër të garancisë, nëse ka nevojë edhe disa herë, por nuk pranojnë të ndërrohet prodhimi dhe as të kthehen të hollat. Me fjalë të tjera shpesh tek prodhimet teknike ankesat më të mëdha janë për paraqitjen e prishjes së prodhimit pas blerjes së tij në afat prej gjashtë muajsh. Ankesa ka edhe për prodhim të dorëzuar që është i dëmtuar si teknikë e bardhë apo televizor, ku konsumatorët duhet të nënshkruajnë se e kanë pranuar se çdo gjë është në rregull, për shkak se transportuesi ka nxituar.
“Gjatë dorëzimit të prodhimit, përderisa ai akoma është në kuti, konsumatorët nënshkruajnë se kanë pranuar prodhimin, duke mos ditur se është i dëmtuar, por ndër të tjerash me nënshkrim konfirmojnë se është i fituar në gjendje të rregullt. Kjo ndodh si rrjedhojë e situatës së pavolitshme në të cilën është i vendosur konsumatori që në moment të ngutjes të mos kontrollojë se a është me të vërtetë prodhimi I pa dëmtuar , andaj nënshkruan duke i besuar tregtarit apo transportuesit”, thonë nga Organizata e Konsumatorëve të Maqedonisë, transmeton KOHA. Probleme të njëjta ka pasur edhe në vitet paraprake.
Në ndërkohë, një numër i madh i ankesave ka arritur edhe për materialin jocilësor, nga i cili janë prodhuar këpucët dhe veshmbathjet që menjëherë janë dëmtuar dhe nuk mund të kthehen për shkak se konsumatori nuk mund të realizojë të drejtën ligjore për kthimin e prodhimit, këmbimin ose kthimin e të hollave për shkak se prodhimi pak ka ndryshuar formën ose nuk është në paketimin origjinal.
Lidhur me ankesat e konsumatorëve për shërbimet financiare kanë dominuar ato të gjetjes së mënyrës se si të zgjidhet problem me bankat për përllogaritjen e kamatës, hapjen apo mbylljen e llogarisë apo kredisë. Vlen të theksohen edhe ankesat për këshillat shtëpiak , ose për punën joprofesionale të menaxherit të ndërtesës që nuk i përmbush obligimet nga kontrata lidhur për mirëmbajtjen e banesës dhe të ngjashme. Njëherësh, rriten edhe ankesat për faturat e larta për mirëmbajtjen e banesës.
Pritet që përgjatë vitit 2019, të tejkalohen problemet dhe të ulen ankesat për kamatat e mëdha të kredive të shpejta, pasi Ministria e Financave përkufizoi kamatat në maksimum 50 për qind të bazës së kredisë në vlerë deri 200 euro. Nga ana tjetër janë zvogëluar ankesat për shërbimet turistike. Shënohet përmirësim i punës së agjencive turistike dhe ulje e mos respektimit të kontratave të operatorëve turistike në raport me një vit më parë. (koha.mk)
