Zhduket kuzhinieri nga Vlora, është parë për herë të fundit në mitingun e Lulzim Bashës

Familjarët e 50-vjeçarit Arjan Shabanaj nga Selenica kanë 9 ditë që nuk kanë asnjë kontakt me të afërmin e tyre. Nëna e tij, Tefta tregon se i humbi kontaktet me të birin mbrëmjen e 21 prillit, kur të dy morën pjesë në mitingun elektoral që mbahej nga PD në zonë.

Pas mitingut nëna thotë se u kthye në shtëpi, por i biri nuk e ndoqi nga pas.

Marketing

“Atë natë që erdhi zoti Lulzim Basha shkuam atje, qëndruam atje në kohën që erdhi zoti Lulzim Basha, nja 10 minuta dhe mua djali më tha, nëna mos kalo këtej nga turma se do të shtypin njerëzit, por kalo këtej nga është rruga për shtëpi. Dhe unë ashtu bëra, me 3-4 gjitonë që kisha erdha në shtëpi. Prita 20 minuta nuk po më vinte djali, e marr në telefon dhe telefoni u mbyll, por jo sikur u mbyll vetë, por sikur e mbylli njeri. Kur e mora prapë telefoni u fal fare dhe u shqetësova dhe u ngrita dhe dola në Pazar. Bëra denoncimin, ka qenë ora 2 e 30-3 e natës”, tregon ajo.

Nëna e 50-vjeçarit me profesion kuzhinier, tregon se e ka mësuar nga shokët e të birit që mbrëmjen e 21 prillit, pas përfundimit të mitingut, ai është nisur me makinë drejt Vlorës dhe që atë ditë s’ka mësuar më gjë prej tij.

“Dëgjova nga shoku i tij që e dëgjova Arjanin që tha dhe unë do vij me ca shokë në Vlorë. Mirë kishte thënë ai, shihemi në Vlorë. Me kë shok iku ky njeri, me kë ka hipur ky njeri në këtë makinë? Ku vajti kjo makinë?”, janë pyetjet e të moshuarës që kërkon të birin prej 9 ditësh.

Nëna e 50-vjeçarit tregon se Arjani është një kuzhinier profesionist që prej vitesh ka punuar dhe përtej kufijve dhe mohon që ai të ketë pasur konflikte pasi ishte i qetë dhe pa probleme. Dyshimet e saj janë që i biri mund të jetë vrarë që mbrëmjen e 21 prillit.

“Djali ka qenë shef kuzhine për 15 vjet. Ai nuk kishte ndonjë shoqëri të keqe. Në qoftë se kishte ndonjë konflikt në telefon nuk e di, por kështu nuk kemi pasur. Dyshimi aty është, mua thashë djalin ma vranë socialistët. Unë dua ta gjej të vdekur se i gjallë nuk gjendet më ai. Që atë natë, jo më tutje, e kanë bërë që atë natë të zezën”, deklaron nëna e të zhdukurit.
Arjan Shabanaj i cili rezulton që prej datës 21 prill i humbur, prej një moshe të re punonte në kuzhinë, madje dhe në shtëpitë e VIP-ave, futbollistëve apo edhe politikanëve shqiptarë.

Marketing